वीरगंज महानगरपालिकाले वडा नं. २ स्थित रेलवे रोड, छपकैयामा निर्माण गरेको छपकैया तरकारी तथा फलफूल थोक बजार उद्घाटन भएको एक हप्ता पुग्दासमेत सञ्चालनमा आउन सकेको छैन्र ।
गत आइतबार नगरप्रमुख राजेशमान सिंहले बजारको उद्घाटन गरेका भए पनि बिपी उद्यानमा रहेका पुराना व्यवसायीहरू त्यहाँबाट स्थानान्तरण हुन तयार नदेखिएपछि नयाँ बजार सुनसान बनेको हो ।महानगरको योजना बिपी उद्यानलाई खाली गरी हरित पार्कका रूपमा विकास गर्ने रहेको छ । नगरप्रमुखका प्रेस सल्लाहकार नवराज फुयाँलका अनुसार छपकैया बजारमा सटर, कोल्ड स्टोर, पार्किङ, खानेपानी, शौचालयसहित सबै सुविधा उपलब्ध गराइएको र बिपी उद्यानमा रहेको थोक बजार त्यहाँबाट सार्नु अपरिहार्य भएको बताए ।
डेढ दशक पुरानो अस्थायी बजार हट्न नसक्दा समस्या
करीब १५ वर्षअघि मीनाबजार तरकारी बजार कम्प्लेक्स निर्माणका क्रममा थोक तथा खुद्रा व्यापारीलाई अस्थायी रूपमा बिपी उद्यानमा राखिएको थियो । कम्प्लेक्स निर्माण भए पनि अधिकांश व्यापारी उद्यानमै स्थायी रूपमा बस्न पुगेका थिए। एक वर्षअघि बिपी उद्यान खाली गर्न सूचना जारी गरिए पनि तरकारी बजार हटाउन महानगर असफल भएको थियो ।
उक्त समयमा उद्यानमा रहेका २१ दलित परिवारका अस्थायी बासस्थान हटाइए पनि तरकारी थोक बजार भने यथावत् रह्यो । पछिल्लो चरणमा सर्वोच्च अदालतको आदेशपछि विवादित जग्गा नेपाल सरकारको नाममा आएपछि महानगरले छपकैया क्षेत्रमा नयाँ थोक बजार निर्माण गरेको हो ।
३५ थोक गोदाम, ३५० साना पसल स्थानान्तरणमा ठूलो चुनौती
छपकैया बजारमा २८ वटा सटर, दुईवटा कोल्ड स्टोर, गोदामघर, पानी, शौचालय तथा पार्किङ सुविधा निर्माण गरिएको छ । तर बिपी उद्यानमा रहेका ३५ थोक गोदाम र ३५० को हाराहारीका सेमिहोलसेल तथा खुद्रा पसल एकसाथ स्थानान्तरण गर्न समय लाग्ने व्यवसायीहरूको भनाइ छ । उद्यानस्थित बजारका अध्यक्ष जग्गु प्रसादका अनुसार व्यवसायीहरूले महानगरसँग १० दिनको समय मागेकाे छ ।महानगरले माइकीङ मार्फत सूचना जारी गरेपछि सोमबार र मंगलबार उद्यानमा किसान तथा व्यापारीको भीड न्यून देखिएको र कारोबार प्रभावित भएको उनले बताए ।
महानगरका अन्य बजार अझै अव्यवस्थित
छपकैया तरकारी थोक बजार र मीनाबजार कम्प्लेक्सबाहेक महानगरपालिकाले अन्य स्थानका तरकारी बजार व्यवस्थित पार्न सकेको छैन । बिर्ता, बुखारचोक, नगवा, इनर्वा, ब्रह्मचोक, मुर्ली, रानीघाट, मीनाबजार क्षेत्र र गीतामन्दिरलगायत वडास्तरीय चोकचोकमा अझै पनि अस्थायी र अव्यवस्थित रूपमा तरकारी बिक्री वितरण भइरहेको छ ।
महानगरले छपकैया बजारलाई प्राथमिकता दिएर सञ्चालनमा ल्याउने प्रयास गरिरहेको भए पनि व्यवसायीहरू स्थानान्तरणमा ढिलाइ गरेपछि तत्काल बजार सञ्चालन हुने सम्भावना कमजोर देखिएको छ ।
सम्बन्धित समाचार
भन्सार नाकामा तरकारी–फलफूल विषादी परीक्षण अनिवार्य गर्न सर्वोच्च अदालतकाे परमादेश (भिडियाे सहित)
फोहोरमैला थुप्रो मै व्यापार : वीरगंजको घण्टाघर तरकारी बजारको अवस्था दयनीय, नागरिककाे स्वास्थ्यमाथि खेलवाड (भिडियाे सहित)
मधेश झरे पहाडका तरकारी : मूल्यवृद्धिका बीच उपभोक्तालाई राहत
बाढीले तहसनहस तरकारी बजारमा अनुगमन गर्न पुगेका मन्त्री भण्डारीलाई व्यापारीहरूले लखेटे
