वैदेशिक रोजगारीमा आकर्षक तलबको प्रलोभन देखाई ठगी गर्ने तीन जनालाई प्रहरीले पक्राउ गरेको छ । यूके पठाइदिन्छु भन्दै पीडितहरूबाट रकम असुलेर सम्पर्कविहीन भएको आरोपमा उनीहरू पक्राउ परेका हुन् ।
पक्राउ पर्नेहरूमा दाङ राप्ती गाउँपालिका–१ बस्ने तथा प्यूठान नगरपालिका–९ स्थायी घर भएका ३९ वर्षीय इन्द्रबहादुर केसी, काठमाडौं स्वयम्भू बस्ने तथा धादिङ थाक्रे गाउँपालिका–५ घर भएका ४० वर्षीय आइते तामाङ र काठमाडौं महानगरपालिका–१५ बस्ने ३४ वर्षीय विजय गुरुङ रहेका छन् ।
प्रहरीका अनुसार इन्द्रबहादुर केसी र आइते तामाङले यूके पठाइदिन्छु भन्दै सात जना पीडितबाट १३ लाख रुपैयाँ ठगी गरेका थिए । यस्तै, विजय गुरुङले एक जना पीडितबाट पाँच लाख रुपैयाँ लिएर सम्पर्कविहीन भएपछि पीडितहरूले उजुरी दिएका थिए ।
उजुरीका आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले इन्द्र केसी र आइते तामाङलाई बिहीबार काठमाडौं महानगरपालिका–२६ गोंगबुबाट तथा विजय गुरुङलाई आइतबार काठमाडौं महानगरपालिका–१४ बाट पक्राउ गरेको हो ।
पक्राउ परेका इन्द्र केसी र आइते तामालाई आवश्यक अनुसन्धान तथा कारबाहीका लागि जिल्ला प्रहरी परिसर काठमाडौं पठाइएको छ भने विजय गुरुङलाई वैदेशिक रोजगार विभाग ताहाचल, काठमाडौं पठाइएको प्रहरीले जनाएको छ ।
