नेपाल राष्ट्र बैंकले आज (बुधबार) बैंक तथा वित्तीय संस्थाबाट २० अर्ब रुपैयाँ निक्षेप संकलन गर्ने भएको छ ।
बैंक तथा वित्तीय संस्थामा ऋण दिन मिल्ने रकम (तरलता) धेरै भएकाले राष्ट्र बैंकले निक्षेप संकलन उपकरणमार्फत् रकम झिक्न थालेको हो । यसअघि पनि राष्ट्र बैंकले गत दुई सातामा ९ वटा ऋणपत्रमार्फत २ खर्ब रुपैयाँ बजारबाट झिकिसकेको थियो । ती ऋणपत्र एक वर्षको अवधिका लागि जारी गरिएको थियो ।
गत आइतबार र आज राष्ट्र बैंकले अर्को उपकरणमार्फत ६३ दिनका लागि २० अर्ब रुपैयाँ झिक्ने तयारी गरेको छ । पछिल्ला तीन वर्षयता राष्ट्र बैंकले हरेक आइतबार र बुधबार नियमित रूपमा बजारबाट पैसा झिक्दै आएको छ । ऋणपत्र जारी भएपछि केही समय निक्षेप संकलन उपकरण जारी गरिएको थिएन ।
निक्षेप संकलनमा रकम राख्न चाहने बैंक तथा वित्तीय संस्थाले आज दिउँसो २ बजेसम्म अनलाइन बोलकबोल गर्न सक्ने राष्ट्र बैंकद्वारा जारी सूचनामा उल्लेख छ । ‘क’, ‘ख’ र ‘ग’ वर्गका बैंक तथा वित्तीय संस्था मात्र बोलकबोलमा सहभागी हुन पाउनेछन् । यसरी खरिद गरिएको निक्षेप संकलन उपकरण अन्य बैंक तथा वित्तीय संस्थामा धितोको रूपमा प्रयोग गर्न सकिने राष्ट्र बैंकले जनाएको छ ।
निक्षेप संकलनमा घटीमा १० करोड र बढीमा ५ करोड रुपैयाँले भाग गर्दा निःशेष भाग जाने गरी बोलकबोल गर्न सकिने व्यवस्था छ । बोलकबोल ब्याजदरमा हुने भए पनि बहुब्याजदरमा बहु–बोलकबोल गर्न सकिने व्यवस्था राष्ट्र बैंकले जारी सूचनामा उल्लेख गरेको छ ।
