आइतवार देशभरि राष्ट्रिय सभा निर्वाचन हुँदैछ। मधेश प्रदेशमा पनि मतदान महेन्द्र नारायण निधि प्रतिष्ठानमा बिहान ९ बजेदेखि ३ बजेसम्म सञ्चालन हुने र सम्पूर्ण तयारी पूरा भएको राष्ट्रिय सभा निर्वाचन अधिकृतको कार्यालयले जनाएको छ ।
मधेश प्रदेशका चार सिटका लागि नेपाली कांग्रेस, नेकपा एमाले, लोकतान्त्रिक समाजवादी पार्टी (लोसपा) नेपाल, जनता समाजवादी पार्टी (जसपा) नेपाल, नेपाल कम्युनिष्ट पार्टी (नेकपा) लगायतका दलका ११ जना उम्मेदवारले चुनावी दाबी पेश गरेका छन् । प्रदेशमा दलित, अल्पसङ्ख्यक/अपाङ्ग, महिला र अन्य सिटमा निर्वाचन हुनेछ ।
निर्वाचनमा कांग्रेस–एमाले–जसपा नेपाल गठबन्धनमा छन् भने नेकपा एकलै चारवटै क्षेत्रमा आफ्ना उम्मेदवार खडा गरेको छ । यसै क्रममा, जसपा नेपालको समर्थनमा लोसपाबाट सर्लाहीका महन्थ ठाकुरले उम्मेदवारी दर्ता गराएका छन् । कांग्रेसबाट अल्पसंख्यकतर्फ सप्तरीका रञ्जित कर्ण, दलिततर्फ रौतहटका धर्मेन्द्र पासवान, महिला तर्फ महोत्तरीकी रेखा झाले उम्मेदवारी दिएका छन् ।
जसपा नेपालको समर्थनमा लोसपाका ठाकुर भए पनि, जसपा नेपालले छुट्टै आफ्ना उम्मेदवार खडा गरेको थियो । जसपा नेपालबाट अल्पसंख्यकतर्फ शैलेश चौधरी, महिलातर्फ चन्द्रकला साह, दलिततर्फ चमेली दास उम्मेदवार थिए । यद्यपि दल एकीकरणको क्रममा यसअघि जसपा नेपालका उम्मेदवारी हटाउने सहमति भएको थियो ।
नेकपाबाट अल्पसंख्याकतर्फ रौतहटका रामानन्द प्रसाद, अन्यतर्फ सर्लाहीका लक्ष्मण पौडेल, दलिततर्फ सर्लाहीका शम्भु पासवान र महिला तर्फ धनुषाकी समी अग्रवालले उम्मेदवारी दिएका छन् ।
गठबन्धनका नेताहरूले प्रतिनिधि सभा निर्वाचनले राष्ट्रिय सभा निर्वाचनमा असर नगर्ने दाबी गरे पनि राजनीतिक विश्लेषकहरूले यसको प्रभाव आउन सक्ने अनुमान गरेका छन् ।
मतभार विवरण
मधेश प्रदेशमा प्रदेशसभा सदस्य १०४ र स्थानीय तहका २६६ गरी कुल ३७० मतदाता छन् । प्रदेशसभा सदस्यको मतभार ५३ र स्थानीय तहका प्रमुख–उपप्रमुखको मतभार १९ रहेको छ । निर्वाचन आयोग अनुसार, कुल मतभार १०,५८५ रहेको छ ।
मधेश प्रदेशमा गठबन्धनको पक्षमा ८,१८६ मतभार सुरक्षित देखिएको छ । प्रदेशसभातर्फ १०४ र स्थानीय तहतर्फ २६७ मतदाता कायम गरिएको छ । प्रदेशसभा तर्फ ५,५१२ र स्थानीय तह तर्फ ५,०७३ मतभार रहेको छ ।
दलगत मतभार विवरण:
-
नेपाली कांग्रेस: २२ प्रदेशसभा सदस्य + १०१ स्थानीय प्रतिनिधि → ३,४८५ मतभार
-
नेकपा एमाले: २४ प्रदेशसभा सदस्य + ५५ स्थानीय प्रतिनिधि → २,३१७ मतभार
-
जसपा नेपाल: १८ प्रदेशसभा सदस्य + ५० स्थानीय प्रतिनिधि → १,९०४ मतभार
-
लोसपा: ८ प्रदेशसभा सदस्य + २४ स्थानीय प्रतिनिधि → ८८० मतभार
-
माओवादी केन्द्र: ९ प्रदेशसभा सदस्य + १६ स्थानीय प्रतिनिधि → ७८१ मतभार
-
नेकपा (एकीकृत समाजवादी): ७ प्रदेशसभा सदस्य + ११ स्थानीय प्रतिनिधि → ५८० मतभार
-
जनमत पार्टी: १३ प्रदेशसभा सदस्य + ३ स्थानीय प्रतिनिधि → ७४६ मतभार
-
नागरिक उन्मुक्ति पार्टी, राप्रपा, संघीय समाजवादी पार्टी: १/१ प्रदेशसभा सदस्यबाट १५९ मतभार
-
स्वतन्त्र प्रतिनिधि: ३ स्थानीय प्रतिनिधि → ५७ मतभार
यसैगरी, गठबन्धन दलको बलियो मतभार मधेश प्रदेशमा राष्ट्रिय सभा निर्वाचनमा निर्णायक भूमिका खेल्ने अपेक्षा गरिएको छ ।
