आगामी फागुन २१ गते हुने प्रतिनिधिसभा सदस्य निर्वाचनका लागि दार्चुलामा दुई अस्थायी मतदान केन्द्र कायम गरिएको छ । जिल्ला निर्वाचन कार्यालयका अनुसार ब्यास गाउँपालिका–१ का छाङरु र तिंकर गाउँका मतदातालाई लक्षित गरी सदरमुकाम खलंगामा अस्थायी मतदान केन्द्र तोकिएको हो ।
मुख्य निर्वाचन अधिकृत भुवन गिरीका अनुसार भौगोलिक विकटता र मौसमी अवस्थाका कारण लिपुलेकमुनिका छाङरु तथा तिंकरका मतदाता हाल खलंगामै बसोबास गरिरहेका छन् । सोही कारण उनीहरूले सहज रूपमा मतदान गर्न खलंगामै मतदान केन्द्र कायम गरिएको हो ।
अस्थायी मतदान केन्द्र अन्तर्गत छाङरुका मतदाताका लागि कैलाशपति आधारभूत विद्यालय र तिंकरका मतदाताका लागि मोती महिला सङ्घ आधारभूत विद्यालय तोकिएको छ । निर्वाचन कार्यालयले सार्वजनिक गरेको विवरण अनुसार कैलाशपति आधारभूत विद्यालयमा ३ सय ७५ र मोती महिला सङ्घ आधारभूत विद्यालयमा २ सय ४४ मतदाता सूचीकृत छन् ।
विसं २०७९ को निर्वाचनमा छाङरुमा ३ सय ८३ र तिंकरमा २ सय ३४ मतदाता रहेका थिए । मुख्य निर्वाचन अधिकृत गिरीका अनुसार यसअघि स्थानीय तह निर्वाचन पनि ती क्षेत्रमै सम्पन्न भएको थियो ।
स्थानीय बासिन्दाहरूले गत मङ्सिरमा सदरमुकाम झरेपछि माघ ५ गते मतदान केन्द्र खलंगामै राख्न माग गरेका थिए । सो मागलाई मध्यनजर गर्दै यसपटक अस्थायी मतदान केन्द्र कायम गरिएको हो । यसबाट मतदाताको सहभागिता बढ्ने अपेक्षा गरिएको छ ।
दार्चुलाभर प्रतिनिधिसभा निर्वाचनका लागि एक सय १२ मतदानस्थल र एक सय ४३ मतदान केन्द्र तोकिएका छन् । प्रमुख जिल्ला अधिकारी अनिल पौडेलका अनुसार तीमध्ये १५ मतदानस्थल अतिसंवेदनशील, ३२ संवेदनशील र ६५ सामान्य अवस्थामा राखेर सुरक्षा योजना बनाइएको छ ।
मतदाता सङ्ख्याको विवरण अनुसार यसपटक दार्चुलामा कुल ९२ हजार ९ सय ४८ मतदाता रहेका छन् । तीमध्ये ४७ हजार ७ सय ५५ पुरुष र ४५ हजार एक सय ९३ महिला मतदाता रहेका छन् । निर्वाचनलाई व्यवस्थित, निष्पक्ष र शान्तिपूर्ण रूपमा सम्पन्न गर्न सबै तयारी तीव्र पारिएको प्रजिअ पौडेलले जानकारी दिएका छन् ।
