निर्वाचन आयोगले धनुषा निर्वाचन क्षेत्र नम्बर–१ बाट निर्वाचित भएका मातृका यादवको जित अन्ततः आफ्नो आधिकारिक वेबसाइटमा दर्ता गरेको छ ।
गएको सोमबार नै यादव विजयी भए पनि आयोगले उनको नाम वेबसाइटमा अद्यावधिक नगरेको भन्दै विवाद उत्पन्न भएको थियो । आयोगले आज नेकपाबाट विजयी उम्मेदवारहरूको अद्यावधिक सूची सार्वजनिक गर्दै यादवको नाम पनि समावेश गरेको हो ।
धनुषा–१ मा विवाद बढेपछि आयोगले यसअघि दुई पटक फरक–फरक निर्णय गरेको थियो । किशोरी साहको उम्मेदवारी खारेज भएपछि पहिलोपटक आयोगले उनको मतपत्रको छुट्टै लगत राखी मतपरिणाम सार्वजनिक गर्न निर्देशन दिएको थियो । तर दोस्रो निर्णयमा आयोगले उक्त विषयमा सर्वोच्च अदालतमा मुद्दा विचाराधीन रहेकाले मत परिणाम सार्वजनिक नगर्न निर्देशन दिएको थियो । आयोगको निर्देशनपछि निर्वाचन अधिकृतको कार्यालयले मत परिणाम रोक्का गरेको थियो ।
पछिल्लो निर्णयमा आयोगले आफ्नो अडान फेरेपछि नेकपा कार्यकर्ताहरू आन्दोलित बनेका थिए । सोमबार सर्वोच्च अदालतले मुद्दामा अन्तरिम आदेश दिन अस्वीकार गर्दै फागुन २९ गतेका लागि पेसी तोकेपछि निर्वाचन अधिकृतको कार्यालयले यादवलाई निर्वाचित भएको प्रमाणपत्र प्रदान गरेको थियो ।
कानुनसम्मत रूपमा उम्मेदवारी नै खारेज भइसकेको व्यक्तिसँग प्रतिस्पर्धा गराई निर्वाचित घोषणा गर्नु उपयुक्त नहुने जिकिर नेकपाले गरेपछि आयोगले यादवलाई प्रमाणपत्र दिन निर्देशन दिएको हो ।
निर्वाचन परिणामअनुसार धनुषा–१ बाट विजयी यादवले १० हजार ४३० मत प्राप्त गरेका छन् । उनका निकटतम प्रतिस्पर्धी रामपलटन साहले ९ हजार ५०२ मत प्राप्त गरेका छन् भने रामचन्द्र मण्डलले ९ हजार ३२५ मत ल्याएका छन् ।
त्यसैगरी दीपक कार्कीले ४ हजार १४५, मनोज मल्ल ठकुरीले ३ हजार ७२९ तथा ब्रम्हदेव महतोले २ हजार ४०४ मत प्राप्त गरेका छन् ।
आयोगको पछिल्लो निर्णयसँगै धनुषा–१ को निर्वाचन विवाद औपचारिक रूपमा टुंगिएको छ ।
-1772177803.jpg)
