मधेश सरकारमा संलग्न नेकपा माओवादी र एकीकृत समाजवादी पार्टीका मन्त्रीहरुले राजीनामा दिने तयारी गरेका छन्। केन्द्रमा राजनीतिक समिकरण बदलिएसँगै प्रदेशमा पनि त्यसको असर देखिन थालेको छ ।
मधेश सरकारमा सहभागी नेकपा माओवादी र एकीकृत समाजवादी पार्टी सरकारबाट बाहिरन लागेका हुन् । प्रदेश
माओवादी र समाजवादीबाट प्रदेश सरकारकामा दुई–दुई जना मन्त्री छन्।
माओवादी अर्थ र उद्योग तथा पर्यटन र एकीकृत समाजवादी उर्जा सिँचाई तथा खानेपानी र भूमी व्यवस्था कृषि तथा सहकारी मन्त्रालयसहित सरकारमा छ।
संघमा नेकपा एमाले र नेपाली कांग्रेसको सरकार बनाउने सहमती भएसँगै दुवै दलका मन्त्रीलाई मुख्यमन्त्री सतिश सिंहले राजीनामा दिन भनेका थिए।
‘औपचारिक रुपमा मुख्यमन्त्रीबाट हाम्रो दलको नेतालाई राजीनामा दिनुस् भन्ने सूचना आएको छैन। तर राजीनामा दिनुपर्ने हो भन्ने सुनेर हामी जनकपुर आउँदैछौँ,’ उर्जामन्त्री बेची लुंगेलीले भनिन्।
दुवै दलले राजीनामा बुझाएलगत्तै नेपाली कांग्रेस र लोकतान्त्रिक समाजवादी पार्टी (लोसपा) मधेश प्रदेश सरकारमा सहभागी हुनेछन्।
मुख्यमन्त्री सतिशकुमार सिंहले आज विश्वासको मत लिँदैछन्।
बिहान ११ बजे विश्वासको मत लिन प्रदेशसभा बैठक बोलाइएको छ। त्यसअघि नै कांग्रेस र लोसपालाई सरकारमा सहभागी गराउन लागिएको भौतिक पूर्वाधार विकासमन्त्री समेत रहेका एमाले संसदीय दलका नेता सरोजकुमार यादवले बताए।
उनका अनुसार कांग्रेसले चारवटा र लोसपाले दुईवटा मन्त्रालय मागेको छ। माओवादी र समाजवादीले पाएको चारवटा मन्त्रालय कांग्रेसले मागेको हो। लोसपालाई भने तत्काल एउटा मन्त्रालय दिएर सरकारमा सहभागी गराइने उनले बताए।
‘विश्वासको मत लिनु अगाबै दुबै दललाई सरकारमा सहभागी गराउन लागिएको हो। लोसपालई हामीले श्रम तथा यातायात र गृह तथा सञ्चार मन्त्रालय लिन भनेका छौँ तर उसले मानेको छैन। लोसपाले एउटा ठूलो विकासे मन्त्रालय मागिरहेको छ,’ उनले भने।
नेपाल संघीय समाजवादी पार्टीबाट गृहमन्त्री रहेकी विमला अन्सारी र नागरिक उन्मुक्तीबाट श्रम तथा यातायात मन्त्री रहेकी उर्मिला देवी सिंह चौधरीले पनि राजीनामा दिन लागेकी छन्।
