बाराको जीतपुरसिमरा उपमहानगरपालिकामा भएका दुई छुट्टाछुट्टै सवारी दुर्घटनामा परी एक सेवानिवृत्त शिक्षकसहित दुई जनाको ज्यान गएको छ ।
तीव्र गति र सडक सुरक्षा मापदण्डको अवहेलना हुँदा पछिल्लो समय सडक दुर्घटनाहरू बढ्दै गएका छन् । जिल्ला ट्राफिक प्रहरी कार्यालय निजगढका अनुसार रौतहटको सङ्ग्रामपुर घर भई जीतपुरसिमरा–२ मा बसोवास गर्दै आएका ६२ वर्षीय सेवानिवृत्त शिक्षक केदारप्रसाद शर्मा आज बिहानको दुर्घटनामा ज्यान गुमाएका हुन् ।
उपमहानगरपालिका वडा नम्बर–१५ स्थित रजघट्टाबाट डुमरवानातर्फ जाँदै गरेका दुई ट्याक्टरले एकापसमा ओभरटेक गर्ने क्रममा ना. ७ त. ५२५६ नम्बरको ट्याक्टरले मोटरसाइकल चलाइरहेका शर्मालाई ठक्कर दिएको थियो । ठक्करबाट गम्भीर घाइते भएका शर्मालाई उपचारका लागि वीरगन्जस्थित मेडिसिटी अस्पताल लगिएकोमा उपचारकै क्रममा मृत्यु भएको प्रहरीले जनाएको छ ।
प्रहरीले ठक्कर दिने ट्याक्टरका चालक १७ वर्षीय सन्देश कुशवाहा र सवारी साधनलाई नियन्त्रणमा लिएको छ । यसैबीच, आइतबार राति अर्को दुर्घटनामा बसको ठक्करबाट ३५ वर्षीय रामकुमार कोइरालाको मृत्यु भएको छ ।
जीतपुरसिमरा–२२ मा बा. प्र. ०१–००६ ख. ९९७७ नम्बरको बसले विपरीत दिशाबाट आउँदै गरेको प्र. ३–०२–०१३ प. ३०२१ नम्बरको मोटरसाइकललाई ठक्कर दिएको थियो। कोइराला गोरखा घर भएका थिए । स्थानीयवासीले लगातार बढ्दै गएको दुर्घटनाले सडक सुरक्षा व्यवस्थापनमा थप कडाइ आवश्यक भएको बताएका छन् ।
प्रहरीले दुवै दुर्घटनाबारे थप अनुसन्धान गरी कानुनी प्रक्रिया अघि बढाएको छ।
