सिरहाको मिर्चैया नगरपालिका–६ मटयर्वामा प्रहरी गस्तीमा रहेको गाडीको ठक्करबाट एक बालक गम्भीर घाइते भएका छन् । घाइते हुनेमा २ वर्षीय आयुष मलिक रहेका छन् ।
इलाका प्रहरी कार्यालय मिर्चैयाबाट नियमित गस्तीमा खटिएको प्रहरी टोलीको गाडीले बालकलाई ठक्कर दिएको प्रहरीले जनाएको छ । प्रहरीका अनुसार गस्तीका क्रममा गाडीले बालकलाई छोएपछि उनलाई तत्काल स्थानीय स्तरमै उपचारका लागि लगिएको थियो ।
जिल्ला प्रहरी कार्यालय सिरहाका प्रवक्ता तथा प्रहरी नायब उपरीक्षक रमेशबहादुर पालका अनुसार पीडित पक्षसँगको सहमतिमा बालकलाई थप उपचारका लागि धरान पठाइएको छ ।
तर घटनाबारे बालकका हजुरबुबा जगदीश मलिकले फरक दाबी गरेका छन् । उनका अनुसार बालक गाउँको सडकमा खेलिरहेको बेला प्रहरीको गाडीले ठक्कर दिएको हो, जसका कारण बालक गम्भीर घाइते भएका छन् ।
स्थानीयका अनुसार बालक मामा घर आएका थिए र घर फर्किने तयारीकै क्रममा उक्त दुर्घटना भएको हो । दुर्घटनापछि घाइते बालकलाई मिर्चैयास्थित मनकामना मिड इस्टर्न अस्पतालमा प्रारम्भिक उपचार गराइएको थियो ।
प्रहरीले बालकको अवस्था सामान्य रहेको दाबी गरे पनि परिवारले भने अवस्था चिन्ताजनक रहेको जनाएको छ । घटनाबारे थप अनुसन्धान भइरहेको प्रहरीले जनाएको छ ।
