सडक विस्तारका नाममा गरिएको आकस्मिक तोडफोडपछि वीरगंजमा एक व्यवसायीको ज्यान गएको खबर प्राप्त भएकाे छ ।
घन्टाघरस्थित मेनरोडमा डेरा भाडामा बस्दै आएका व्यवसायी मुरारी लाल बजाज घरबारविहीन बनेपछि आएको मानसिक आघातका कारण हृदयघात भई निधन भएको स्राेतले दाबी गरेको छ । सडक विभागको निर्देशनअनुसार २५/२५ मिटर सडक फराकिलो बनाउने अभियानअन्तर्गत मेनरोड क्षेत्रमा संरचना हटाउने क्रममा पर्याप्त समय नदिई हतारमा तोडफोड गरिएको स्थानीयको आरोप छ । परिवारका अनुसार वैकल्पिक बसोबासको व्यवस्था गर्न नसक्दा बजाज गम्भीर मानसिक तनावमा परेका थिए र सोही कारण गएराति हृदयघात भएको बताएकाे छ ।
स्थानीयवासीले २४ घन्टासमेत समय नदिई गरिएको तोडफोडले मानवीय संवेदनामाथि ठेस पुगेको बताएका छन् । वीरगंजको मुख्य व्यापारिक केन्द्र मानिने उक्त क्षेत्रमा करिब १२ सय संरचना हटाइएको र त्यसबाट झन्डै ४८ सय घरपरिवार तथा साना–ठूला व्यवसाय प्रत्यक्ष प्रभावित भएका छन् ।
मृतक बजाज शारीरिक रूपमा अशक्त समेत रहेको र आदर्शनगरस्थित रुङ्गटा मार्केटमा ‘मुरारी स्टोर्स’ सञ्चालन गर्दै आएका थिए । उनीजस्ता दैनिक आम्दानीमा निर्भर व्यवसायीहरू विस्थापित हुँदा जीवनयापनमा समस्या उत्पन्न भएको स्थानीय व्यापारीहरूको भनाइ छ ।
सडक विस्तार दीर्घकालीन विकासका लागि आवश्यक भए पनि यसको कार्यान्वयन शैली अमानवीय भएको भन्दै कतिपयले आपत्ति जनाएको छ । पूर्वतयारी, पर्याप्त समय तथा वैकल्पिक व्यवस्था विना गरिएको यस्तो कदमले मानवअधिकार उल्लंघनको प्रश्न उठाएको पिडितहरूकाे दाबी रहेकाे छ ।
यसैबीच, विस्थापित भएका धेरै परिवार मानसिक तनाव र डिप्रेसनको शिकार बनेको स्थानीयले बताएका छन् । उक्त घटनाले विकास र मानवीय संवेदनाबीच सन्तुलन कायम गर्नुपर्ने आवश्यकता टड्कारो रूपमा देखिएको छ ।
