लोकतान्त्रिक समाजवादी पार्टी (लोसपा) का अध्यक्ष महन्थ ठाकुरले सरकार तानाशाहीतर्फ अगाडि बढिरहेको आरोप लगाएका छन् ।
सोमबार संसदीय समितिको बैठकमा अध्यक्ष ठाकुरले मन्त्री र प्रधानमन्त्री अनावश्यकरूपमा व्यस्त देखिएको तर जनताको समस्या समाधानमा गम्भीर नभएको आरोप लगाए । सरकारले हरेक क्षेत्रमा आतंक सिर्जना गरेको भन्दै उनले पहिलेको पुस्ता र अहिलेका बिच नराम्रो खाडल खडा गरिएको धारणा राखे ।
‘यो सरकारले आफूलाई जेन–जी सरकार भन्छ, वास्तवमा जेन–जी के हो?’, उनले प्रश्न गरे, ‘के हाम्रो जेनेरेसन खत्तम हो? अहिलेको मात्र सही हो ?’
सांसद विकास कोष हटाइएकोमा असन्तुष्टि जनाउँदै नेता ठाकुरले बजेट विनियोजनको तरिकामा सुधार हुनुपर्ने र क्षेत्र विकासको बजेट पुनः दिनुपर्ने माग राखे ।
