काठमाडौँ | भारतको कोलकातास्थित चर्चित सोनागाछी रेडलाइट क्षेत्र बाट दुई नेपाली बालिकाको उद्धार गरिएको छ ।
मानव बेचबिखनविरुद्ध काम गर्दै आएको किन इन्डिया संस्था को पहलमा उनीहरूको उद्धार गरी सुरक्षित रूपमा नेपाल फिर्ता ल्याइएको हो । उद्धार गरिएका बालिकाहरू नुवाकोट जिल्लाका १४ र १५ वर्षका रहेको संस्थाले जनाएको छ। संस्थाका निर्देशक नविन जोशीका अनुसार उनीहरू मानव बेचबिखनमा परेर सो क्षेत्रको रेडलाइट एरियामा बन्धकजस्तै अवस्थामा राखिएका थिए ।
किन इन्डियाको सक्रिय पहल र भारतीय सम्बन्धित निकायसँगको समन्वयमा बालिकाहरूलाई उद्धार गरी सुरक्षित रूपमा नेपाल ल्याइएको हो । उद्धारपछि उनीहरूलाई सुरक्षित आवास गृहमा राखिएको निर्देशक जोशीले जानकारी दिए । उनका अनुसार हाल बालिकाहरूको स्वास्थ्य तथा मनोसामाजिक अवस्थालाई ध्यानमा राख्दै आवश्यक परामर्श र संरक्षण प्रदान गरिएको छ ।
घटनाबारे थप अनुसन्धान भइरहेको बताउँदै जोशीले बालिकाहरू कसरी बेचबिखनमा परे र यसमा को–को संलग्न छन् भन्ने विषयमा अनुसन्धान जारी रहेको जानकारी दिए। अनुसन्धानपछि संलग्न व्यक्तिहरूमाथि कानुनी कारबाही प्रक्रिया अघि बढाइने उनले बताए ।
मानव बेचबिखन जस्तो गम्भीर अपराध न्यूनीकरणका लागि सीमापार निगरानी, कडा कानुनी कार्यान्वयन र जनचेतना आवश्यक रहेको उनको भनाइ छ ।
