भारतीय प्रधानमन्त्री नरेन्द्र मोदीले राष्ट्रिय स्वतन्त्र पार्टी (रास्वपा) का सभापति रवि लामिछाने सँग भएको भेटवार्तापछि प्रसन्नता व्यक्त गरेका छन् ।
भेटपछि उनले सामाजिक सञ्जाल ‘एक्स’ मार्फत साझा र समृद्ध भविष्यका लागि सहकार्य गर्ने लामिछानेको इच्छालाई पूर्ण समर्थन र स्वागत गरेको बताएका छन् । मोदीका अनुसार भेटवार्तामा दुई देशबीचको सम्बन्ध, क्षेत्रीय सहकार्य तथा भविष्यको साझेदारीबारे छलफल भएको थियो ।
उनले नेपाललाई भारतको ‘नेबरहुड फर्स्ट’ नीतिअन्तर्गत प्राथमिकताप्राप्त साझेदार राष्ट्रका रूपमा उल्लेख गर्दै द्विपक्षीय सम्बन्ध अझ सुदृढ बनाउने प्रतिबद्धता व्यक्त गरेका छन् । मोदीले एक्समा लेखेका छन् कि साझा विकास र समृद्ध भविष्यका लागि नजिकबाट काम गर्ने लामिछानेको इच्छालाई आफूले हार्दिक रूपमा स्वागत र समर्थन गर्दछ ।
उनले नेपालसँगको विशेष तथा बहुआयामिक सम्बन्धलाई अझ उच्च स्तरमा पुर्याउने अपेक्षा गर्दै नयाँ सरकारसँग सहकार्य विस्तार गर्ने प्रतिबद्धता पनि जनाएका छन् । उक्त भेटलाई राजनीतिक तथा कूटनीतिक वृत्तमा महत्त्वपूर्ण संकेतका रूपमा हेरिएको छ ।
विश्लेषकहरूका अनुसार यस्तो उच्चस्तरीय अभिव्यक्तिले नेपाल–भारत सम्बन्धमा आगामी दिनमा सहकार्यका नयाँ क्षेत्र खुल्न सक्ने सम्भावना देखाएको छ । यसैबीच, राष्ट्रिय स्वतन्त्र पार्टी (रास्वपा) ले भेटवार्तालाई सकारात्मक कूटनीतिक संवादका रूपमा लिएको जनाएको छ ।
पार्टी अध्यक्ष लामिछानेले साझा हित र क्षेत्रीय स्थायित्वका लागि निरन्तर संवाद आवश्यक रहेको बताएका छन् ।
