काठमाडौं । भारतको आम आदमी पार्टीका राष्ट्रिय संयोजक अरविन्द केजरीवालले कक्रोच जनता पार्टीले गरेको प्रदर्शनलाई भारतीय युवाभित्र बढ्दो आक्रोश र निराशाको अभिव्यक्ति भएको बताएका छन् ।
शनिबार सामाजिक सञ्जालमार्फत प्रतिक्रिया दिँदै केजरीवालले कक्रोच जनता पार्टीका मागप्रति आफ्नो पार्टीको समर्थन रहेको जनाएका हुन् । उनले युवाहरूका आवाजलाई दबाउने प्रयास गर्नुको सट्टा सरकारले उनीहरूका समस्या समाधान गर्न ध्यान दिनुपर्ने बताएका छन् ।
उनले आन्दोलनरत युवाहरूलाई राष्ट्रविरोधीको आरोप लगाउनु गलत भएको उल्लेख गर्दै सरकारलाई उनीहरूको भावना बुझ्न आग्रह गरेका छन् । साथै प्रधानमन्त्री नरेन्द्र मोदीलाई तत्काल शिक्षामन्त्री धर्मेन्द्र प्रधानलाई पदबाट हटाउन सुझाव दिएका छन् ।
शनिबार नयाँ दिल्लीस्थित जन्तरमन्तरमा कक्रोच जनता पार्टीले बृहत प्रदर्शन गरेको थियो । प्रदर्शनमा सहभागीहरूले शिक्षा प्रणाली सुधार, प्रश्नपत्र चुहावट नियन्त्रण तथा जिम्मेवार पदाधिकारीमाथि कारबाहीको माग गर्दै नाराबाजी गरेका थिए ।
यसैबीच, कक्रोच जनता पार्टीका संस्थापक अभिजित दीपके शनिबार बिहान अमेरिकाबाट भारत पुगेका छन् । उनको आगमनसँगै प्रदर्शन थप चर्चामा आएको भारतीय सञ्चारमाध्यमहरूले जनाएका छन् ।
