विराटनगर । नेपाली कांग्रेसका नेता मोहनबहादुर बस्नेतले विशेष महाधिवेशनबाट आएको नेतृत्वले पार्टीलाई इतिहासकै कमजोर मोडमा पुर्याएको आरोप लगाएका छन् ।
विराटनगरमा कांग्रेस इतर पक्षद्वारा आयोजित एक भेलालाई सम्बोधन गर्दै बस्नेतले पार्टीभित्रको आन्तरिक विवाद र क्रियाशील सदस्यता नवीकरणको विषयलाई लिएर नेतृत्वप्रति आक्रोश व्यक्त गरे ।
उनले वर्तमान नेतृत्वले जानाजानी पुराना तथा स्थापित नेताहरूलाई पाखा लगाउने प्रयास गरेको आरोप लगाए ।
बस्नेतका अनुसार बीपी पुत्र शशांक कोइराला, प्रकाशमान सिंह र विमलेन्द्र निधि जस्ता प्रभावशाली नेताहरूको क्रियाशील सदस्यता नवीकरणमा अवरोध सिर्जना गरिएको छ ।
‘बीपी पुत्रदेखि ६०–६५ वर्ष पार्टीमा योगदान दिएका वरिष्ठ नेताहरूको सदस्यता रद्द हुने, तर नयाँका नाममा बिना कुनै डाटा सदस्यता थपिने काम भइरहेको छ,’ उनले भने, ‘यो कांग्रेस सिध्याउने षड्यन्त्र हो ।’
उनले पार्टीलाई कमजोर बनाउने काम विभिन्न गतिविधिमार्फत भइरहेको भन्दै त्यसको मुख्य जिम्मेवार वर्तमान सभापति गगन थापा रहेको आरोप समेत लगाए ।
बस्नेतले पार्टीलाई जोगाउन र सुदृढ बनाउन सबै नेता तथा कार्यकर्ता एकताबद्ध भएर अघि बढ्नुपर्ने आवश्यकता रहेको बताए ।
