सुनसरीको कप्तानगञ्जमा भएको हिंसात्मक घटनापछि सरकारले सुनसरीका सुरक्षा प्रमुखदेखि कोशी प्रदेश प्रहरी प्रमुखसम्मका अधिकारीलाई जिम्मेवारीबाट हटाउँदै काठमाडौँ तानेको छ ।
गृह मन्त्रालयले सुनसरीका प्रमुख जिल्ला अधिकारी (सीडीओ) बासुदेव घिमिरेलाई मन्त्रालयमा सरुवा गरेको छ । उनको स्थानमा संखुवासभाका प्रमुख जिल्ला अधिकारी ईश्वरीप्रसाद अर्याललाई सुनसरीको सीडीओको जिम्मेवारी दिइएको छ । त्यस्तै, कोशी प्रदेश प्रहरी कार्यालयका प्रमुख प्रहरी नायब महानिरीक्षक (डीआईजी) विनोद घिमिरेलाई प्रहरी प्रधान कार्यालय तानिएको छ भने प्रहरी प्रधान कार्यालयमा कार्यरत डीआईजी शेखर खनाललाई कोशी प्रदेश प्रहरी कार्यालयको प्रमुख बनाइएको छ ।
सुनसरीका प्रहरी प्रमुख प्रहरी उपरीक्षक (एसपी) केशव थेवेलाई भैरहवास्थित गौतमबुद्ध अन्तर्राष्ट्रिय विमानस्थलमा सरुवा गरिएको छ । उनको स्थानमा विमानस्थलमा कार्यरत एसपी पुष्पराज मल्ललाई सुनसरी पठाइएको छ । यसैगरी सशस्त्र प्रहरी बल नेपाल कप्तानगञ्जमा कार्यरत डीएसपी नन्दकिशोर महतोलाई फिर्ता बोलाइएको छ । उनको ठाउँमा सशस्त्र प्रहरी बल नेपाल प्रधान कार्यालय काठमाडौँबाट डीएसपी मदन नाथलाई पठाइएको छ ।
सुनसरीको कप्तानगञ्जमा दुई समूहबीच भएको झडपमा एक जनाको मृत्यु भएपछि क्षेत्र तनावग्रस्त बनेको थियो । झडपपछि प्रदर्शन नरोकिएपछि स्थानीय प्रशासनले कर्फ्यु जारी गरेको थियो भने दिउँसोदेखि नेपाली सेना परिचालन गरिएको छ ।
घटनाको छानबिनका लागि गृह मन्त्रालयले सहसचिव भूपेन्द्र थापाको संयोजकत्वमा पाँच सदस्यीय छानबिन समिति गठन गरिसकेको छ ।
