भारतको बिहारस्थित पूर्वी चम्पारणको मोतीहारी जिल्ला अदालतले नेपालबाट भारततर्फ गाँजा तस्करी गरेको अभियोगमा तीन जनालाई जनही १० वर्षको सश्रम कारावासको फैसला सुनाएको छ ।
मोतीहारीस्थित एनडीपीएस अदालत–२ का विशेष न्यायाधीश बृजेश कुमारको इजलासले हरसिद्धि थाना क्षेत्रको मुंशी बजार निवासी अंकित कुमार, कमलजीत कुमार र रितु कुमारलाई दोषी ठहर गर्दै उक्त सजाय सुनाएको हो ।
अदालतले तीनै जनालाई विभिन्न धाराअन्तर्गत जनही १ लाख भारतीय रुपैयाँ जरिवानासमेत तोकेको छ । जरिवाना रकम बुझाउन नसकेमा थप ६ महिना कैद सजाय भुक्तान गर्नुपर्ने फैसलामा उल्लेख छ।
कारभित्र लुकाएर ल्याइएको थियो २८ किलोभन्दा बढी गाँजा
यो मुद्दा १६ जनवरी २०२५ मा गाँजा बरामद भएको घटनासँग सम्बन्धित छ। नेपालबाट ठूलो परिमाणमा लागुऔषध भारततर्फ ल्याइँदै गरेको सूचना पाएपछि आदापुरको हरपुर थानाका तत्कालीन थानाध्यक्ष किशन कुमार पासवानको नेतृत्वमा प्रहरी टोली परिचालन गरिएको थियो।
प्रहरीले हरपुर–बैरिया चिकनीस्थित पेट्रोल पम्पनजिक एउटा हुन्डाई कार रोकेर खानतलासी गर्दा कारबाट २८ किलो ३०० ग्राम गाँजा बरामद गरेको थियो ।
गाँजा बरामद भएपछि प्रहरीले कारमा सवार तीनै जनालाई पक्राउ गरी न्यायिक हिरासतमा पठाएको थियो ।
सात साक्षी र प्रमाणका आधारमा दोषी ठहर
एनडीपीएस ऐनअन्तर्गत दायर भएको मुद्दामा अभियोजन पक्षले अदालतसमक्ष सात जना साक्षी प्रस्तुत गरेको थियो । साक्षीको बयान, उपलब्ध प्रमाण तथा दुवै पक्षका कानुनी बहस सुनेपछि अदालतले तीनै जनालाई दोषी ठहर गर्दै सजाय सुनाएको हो ।
नेपालसँग सीमा जोडिएको बिहार क्षेत्रमा लागुऔषध तस्करी नियन्त्रणका लागि भारतीय अदालतबाट आएको यो फैसला कडा कानुनी सन्देशका रूपमा हेरिएको छ। नेपाल–भारत सीमाबाट हुने गाँजा तथा अन्य लागुऔषधको अवैध ओसारपसार नियन्त्रण गर्न दुवै देशका सुरक्षा निकायबीच समन्वय, सीमा निगरानी र सूचना आदानप्रदान थप प्रभावकारी बनाउनुपर्ने देखिएको छ ।
