कलैया उपमहानगरपालिकाले नगरपालिकाअन्तर्गतका सात वटा आधारभूत विद्यालयका प्रधानाध्यापकलाई विद्यालय सञ्चालन नगरेको भन्दै २४ घण्टे स्पष्टीकरण सोधेको छ। रसुवामा आएको बाढीबाट भएको ठूलो मानवीय क्षतिप्रति शोक व्यक्त गर्न सरकारले भदौ २२ गते राष्ट्रिय शोक दिवस मनाउने निर्णय गरेको थियो। उक्त दिन कार्यालय तथा विद्यालय सञ्चालन बन्द गर्ने निर्णय नभए पनि राष्ट्रिय झण्डा आधा झुकाएर शोक मनाउन निर्देशन दिइएको थियो।
तर, कलैया उपमहानगरपालिकाअन्तर्गतका केही विद्यालयमा शोक दिवसका दिन पूर्ण समय पठनपाठन सञ्चालन नभएको अनुगमनका क्रममा भेटिएपछि प्रधानाध्यापकहरूसँग स्पष्टीकरण मागिएको नगरपालिकाको शिक्षा शाखाले जनाएको छ। शिक्षा शाखाका प्रमुख राजीव यादवका अनुसार प्रमुख प्रशासकीय अधिकृत रेशमलाल कँडेलको नेतृत्वमा भएको अनुगमनका क्रममा सात विद्यालय पूर्ण समय सञ्चालनमा नरहेको पाइएको थियो। त्यसपछि ती विद्यालयका प्रधानाध्यापकलाई भदौ २२ गते नै २४ घण्टाभित्र स्पष्टीकरण पेश गर्न पत्र पठाइएको हो।
‘सरकारले विद्यालय बन्द गर्ने वा बिदा दिने निर्णय गरेको थिएन। कार्यालय सञ्चालन हुने गरी राष्ट्रिय शोक मनाउन निर्देशन गरिएको थियो,’ यादवले भने, ‘तर केही विद्यालय केही घण्टा सञ्चालन भएपछि विद्यार्थीको उपस्थिति कम भएको भन्दै बन्द गरिएको पाइयो। विद्यालय पूर्ण अवधि सञ्चालन नभएकाले स्पष्टीकरण सोधिएको हो।’ नगरपालिकाले स्पष्टीकरणको पत्र भदौ २२ गते राति विद्यालयका प्रधानाध्यापकहरू रहेको वाट्सएप ग्रुपमार्फत पठाएको थियो। यसैबीच, स्पष्टीकरण सोधिएका सात प्रधानाध्यापकमध्ये बोधीमाई आधारभूत विद्यालयका प्रधानाध्यापक नन्दकिशोर दुबेको बिहीबार निधन भएको छ।
जिल्लाका शिक्षकका अगुवासमेत रहेका दुबे मधुमेह र रक्तचापसम्बन्धी समस्याबाट पीडित थिए। जागिरे सेवाको उत्तरार्द्धमा रहेका दुबेले स्पष्टीकरण पत्र पाएकै दिन स्वास्थ्यमा समस्या आएपछि कलैया प्रादेशिक अस्पतालमा भर्ना भएका थिए। कलैयाबाट थप उपचारका लागि वीरगञ्जस्थित मेडिकल कलेज रेफर गरिएका उनको उपचारकै क्रममा बिहीबार निधन भएको हो। दुबे बिरामी भएपछि बोधीमाई आधारभूत विद्यालयका सहायक शिक्षकले उनको तर्फबाट स्पष्टीकरणको जवाफ दिएका थिए । दुबेप्रति श्रद्धाञ्जली व्यक्त गर्दै बिहीबार बाराका विद्यालयहरूमा आधा दिन मात्र पठनपाठन सञ्चालन गरिएको जनाइएको छ।
