देशका विभिन्न क्षेत्रमा लगातार वर्षा भइरहेका बेला जल तथा मौसम विज्ञान विभागले किसानलाई तत्काल धान नकाट्न आग्रह गरेको छ ।
अविरल वर्षाका कारण बाढी, पहिरो तथा डुबानको जोखिम बढेको भन्दै विभागले मौसममा सुधार आएपछि मात्र धान काट्ने योजना बनाउन किसानलाई सुझाव दिएको हो । विभागका मौसमविद् रोजन लामिछानेका अनुसार प्रतिकूल मौसममा हतार गरेर धान काट्दा बालीसँगै जनधनको समेत क्षति हुनसक्ने जोखिम छ । उनका अनुसार पूर्वी भूभागमा मौसम क्रमशः सुधार हुँदै गए पनि पश्चिमी क्षेत्रमा वर्षाको प्रभाव अझै कायम रहनेछ ।
लामिछानेले पश्चिमी क्षेत्रमा पछिल्ला ३–४ दिनदेखि लगातार वर्षा भइरहेकाले आइतबारसम्म थप वर्षा हुनसक्ने सम्भावना रहेको बताए। उक्त क्षेत्रमा बाढी तथा पहिरोको जोखिम बढी रहेकाले सर्वसाधारणले विशेष सतर्कता अपनाउनुपर्ने उनको भनाइ छ ।
उनले किसानलाई मौसमको अवस्था बुझेर मौसम खुलेपछि मात्र धान काट्ने योजना बनाउन आग्रह गरे। विभागले जमिन चिरा परेको वा सानो पहिरो देखिएका क्षेत्रका बासिन्दालाई थप सावधानी अपनाउन आग्रह गरेको छ। त्यस्ता स्थानमा जोखिम देखिए तत्काल सुरक्षित स्थानमा सर्न र छिमेकीलाई समेत सचेत गराउन विभागले अनुरोध गरेको छ ।
यसैगरी, नदी तथा खोला किनारमा बसोबास गर्ने समुदायलाई जलसतह बढ्न सक्ने भएकाले उच्च सतर्कता अपनाउन भनिएको छ । स्थानीय प्रशासन तथा प्रहरीले गर्ने माइकिङ र साइरनलाई बेवास्ता नगर्न पनि विभागले आग्रह गरेको छ ।
विभागले सर्वसाधारणलाई मौसमसम्बन्धी पछिल्लो सूचना नियमित रूपमा हेर्न तथा आवश्यक जानकारीका लागि टोल फ्री नम्बर ११५५ मा सम्पर्क गर्न अनुरोध गरेको छ ।
भिडियाे रिपाेर्ट
