सत्तारुढ राष्ट्रिय स्वतन्त्र पार्टी ९रास्वपा० स्थानीय तहको निर्वाचन केन्द्रित अभियान लिएर असोज २० गतेदेखि देशभरका पालिका पुग्ने भएको छ।
संघीय संसद्को चालु अधिवेशन अन्त्य भएपछि प्रतिनिधिसभा सदस्य र पार्टीका केन्द्रीय सदस्यहरू अभियानका क्रममा पालिका पुग्ने रास्वपाले जनाएको छ।
रास्वपा सहमहामन्त्री निशा डाँगीका अनुसार अभियानमार्फत नागरिकका कुरा सुन्नुका साथै पार्टीका योजना र आगामी स्थानीय तह निर्वाचनमा उम्मेदवार छनोटको प्रक्रियाबारे जानकारी गराइनेछ।
रास्वपाले अभियानका मुख्य दुई उद्देश्य तय गरेको छ। पहिलो, स्थानीय तहको कामकारबाही तथा आगामी निर्वाचनमा उम्मेदवार छनोटको विधिबारे नागरिकलाई जानकारी गराउने र दोस्रो, वर्तमान सरकार गठन भएयता संसद् र सरकारमार्फत भएका नीतिगत पहल तथा कामबारे जानकारी दिने रहेको छ।
डाँगीका अनुसार आगामी फागुनमा हुने स्थानीय तह निर्वाचनका लागि सक्षम, इमानदार र नेतृत्व लिन तयार व्यक्तिलाई उम्मेदवारका रूपमा अगाडि बढाउने प्रक्रियाबारे पनि नागरिकलाई बुझाइनेछ।
रास्वपाले यसअघि सार्वजनिक गरेको उम्मेदवार छनोटको रूपरेखाअन्तर्गत ‘क्यान्डिडेट क्लब’, ‘लिडरसिप एकेडेमी’ र लोकतान्त्रिक छनोट प्रक्रियामार्फत उम्मेदवार चयन गर्ने जनाएको छ।
त्यस्तै, सरकार गठन भएको करिब ६ महिनाको अवधिमा संसद् र सरकारमार्फत भएका नीतिगत पहल, नागरिकसँग गरिएका प्रतिबद्धताको कार्यान्वयन अवस्था तथा आगामी योजनाबारे पनि अभियानमार्फत जानकारी गराउने रास्वपाले जनाएको छ।
रास्वपाका सांसद तथा केन्द्रीय सदस्यहरू असोज २० गतेदेखि ७७ जिल्लाका ७५३ वटै पालिकामा पुग्ने बताइएको छ।
