सरकारले प्रशासन सेवातर्फका १७ जना सहसचिवको सरुवा गरेको छ। मंगलबार बसेको मन्त्रिपरिषद् बैठकले विभिन्न मन्त्रालय, आयोग तथा स्थानीय तहमा कार्यरत सहसचिवहरूको जिम्मेवारी हेरफेर गर्ने निर्णय गरेको हो ।
निर्णयअनुसार प्रदेश सचिव जीवलाल भुसाललाई ऊर्जा मन्त्रालयमा सरुवा गरिएको छ। रामकृष्ण पुडासैनीलाई घोराही उपमहानगरपालिका र डा. पुष्पराज शाहीलाई धरान उपमहानगरपालिकाको जिम्मेवारी दिइएको छ ।
त्यस्तै, तीर्थराज राईलाई आदिवासी जनजाति आयोग, भूपेन्द्र थापालाई लगानी बोर्ड, बेदप्रसाद खरेललाई राष्ट्रिय सुरक्षा परिषद्को सचिवालय, चिरञ्जीवी पौडेललाई राष्ट्रिय दलित आयोग तथा रामबन्धु सुवेदीलाई पर्यटन मन्त्रालयमा सरुवा गरिएको छ ।
उदयबहादुर रानामगरलाई रक्षा मन्त्रालयको जिम्मेवारी दिइएको छ भने होमनाथ पौडेललाई प्रधानमन्त्री तथा मन्त्रिपरिषद्को कार्यालयमा सरुवा गरिएको छ ।
यसैगरी आनन्द सारु र मेखबहादुर मंग्रातीलाई अख्तियार दुरुपयोग अनुसन्धान आयोगमा, सुरेन्द्र पौड्याललाई राष्ट्रिय समावेशी आयोगमा तथा कृष्णबहादुर शाही र विष्णुप्रसाद ज्ञवालीलाई गृह मन्त्रालयमा सरुवा गरिएको छ ।
नमराज घिमिरेलाई उद्योग मन्त्रालय र युवराज अधिकारीलाई मुस्लिम आयोगमा सरुवा गर्ने निर्णयसमेत मन्त्रिपरिषद्ले गरेको छ ।
