नेपाली कांग्रेसका केन्द्रीय सदस्य राधेश्याम पाठकले आफ्नै परिवारका ११ जनालाई क्षेत्रीय प्रतिनिधि बनाएको खुला भएको छ ।
कांग्रेसको १५ औँ महाधिवेशन अन्तर्गत भएको नवलपरासी (पश्चिम) को रामग्राम नगरपालिकाको वडा नम्बर ९ को अधिवेशनबाट पाठकले आफूसहित ११ जनालाई क्षेत्रीय प्रतिनिधि बनाएको खुलासा भएको हो।
उक्त वडा अधिवेशनपछिको क्षेत्रीय प्रतिनिधि सूचीमा पाठकसहित उनको परिवारका ११ जनाको नाम छ। वडा अधिवेशनबाट चयन हुने २४ क्षेत्रीय प्रतिनिधिमध्ये पाठकले ११ जना आफ्नै परिवारबाट राखेका हुन् ।
प्राप्त सूची अनुसार चन्द्र शेखर पाठक, आशुतोष पाठक, कालिन्दी पाठक, गीता पाठक, जयदेव पाठक, तुषार पाठक, दामोदर पाठक, बेदव्यास पाठक, भोला पाठक आफू र विश्वेश्वरप्रसाद पाठकलाई क्षेत्रीय प्रतिनिधि बनाएका हुन् ।
पाठक गत पुसमा भएको विशेष महाधिवेशनबाट मधेसी कोटाबाट केन्द्रीय सदस्य बनेका थिए ।
उक्त वडाको अधिवेशन असोज ५ गते भएको थियो । पाठकको परिवारका ११ सदस्य क्षेत्रीय प्रतिनिधि भएपछि उक्त वडाका कतिपय कांग्रेस कार्यकर्ताले असन्तुष्टि पोखेका छन् । एक कांग्रेस स्थानीय नेताले पाठकले आफ्नो शक्तिको दुरुपयोग गरेर आफूहरुलाई पाखा लगाएर परिवारका सदस्यलाई स्थान दिएको आरोप लगाए ।
तर पाठकले भने आफ्नो परिवारका ११ जनालाई क्षेत्रीय प्रतिनिधि बनाएको स्वीकार्दै आफूले जबरजस्ती नगरेको बताए । “हो, ११ जना प्रतिनिधि भएका छन् । निर्वाचन भएको होइन । जनताले हाम्रो लगानीलाई देखेर सर्वसम्मत बनाइदिएका हुन्,” पाठकले भने, “मैले बनाएको होइन । सर्वसम्मत भएका हुन् । हाम्रो परिवार २ सय जनाको छ । ११ जना हुनु कुनै ठुलो कुरा होइन ।”
