प्रधानमन्त्री बालेन्द्र शाह (बालेन)को सम्भावित भारत भ्रमणको चर्चा भइरहेका बेला भारतका लागि नेपाली राजदूत नियुक्तिको विषय संसदीय सुनुवाइ समितिमा उठेको छ ।
भारतका लागि हाल नेपाली राजदूत नरहेको अवस्थामा प्रस्तावित राजदूत डा. निश्चलनाथ पाण्डेको संसदीय सुनुवाइ प्रक्रिया छिटो अघि बढाउनुपर्ने धारणा समितिका सदस्यहरूले राखेका हुन् ।
सरकारले भारतसहित विभिन्न मुलुकका लागि १३ जना राजदूतको नाम सिफारिस गरेको छ। मंगलबार बसेको संसदीय सुनुवाइ समितिको बैठकमा प्रस्तावित राजदूतविरुद्ध परेका उजुरी तथा उनीहरूका कार्ययोजना सदस्यहरूलाई वितरण गरिएको थियो ।
प्रस्तावित राजदूतहरूको सुनुवाइको मिति तय गर्ने क्रममा प्रधानमन्त्रीको सम्भावित भारत भ्रमणको विषयमा समेत छलफल भएको हो। समितिका सभापति बोधनारायण श्रेष्ठले प्रधानमन्त्रीको भारत भ्रमणबारे जानकारी रहे पनि भ्रमणको मिति भने निश्चित भइनसकेको बताउनुभयो ।
समितिमा सांसदहरूले प्रधानमन्त्रीको भारत भ्रमण तय भए भारतका लागि प्रस्तावित राजदूतको सुनुवाइलाई प्राथमिकता दिनुपर्ने सुझाव दिएका छन्। भारत भ्रमणका क्रममा आवश्यक कूटनीतिक समन्वय र तयारीका लागि सम्बन्धित मुलुकमा राजदूतको उपस्थिति महत्वपूर्ण हुने उनीहरूको भनाइ थियो।
सांसद नरबहादुर बिष्टले प्रधानमन्त्रीको भारत भ्रमण निश्चित भए दिल्लीका लागि प्रस्तावित राजदूतको सुनुवाइ पहिले गर्न सकिने धारणा राख्नुभयो। उहाँले सुनुवाइपछि भारतबाट एग्रिमो लिनुपर्ने भएकाले प्रक्रिया समयमै अघि बढाउनुपर्ने बताउनुभयो ।
त्यस्तै, एमालेकी सांसद पद्मा आर्यालले पनि प्रधानमन्त्रीको भारत भ्रमणको तयारी भइरहेको भए राजदूत नियुक्तिको प्रक्रिया प्राथमिकताका साथ अघि बढाउनुपर्ने बताउनुभयो। उहाँका अनुसार राजदूतले प्रधानमन्त्रीको भ्रमणका लागि आवश्यक कूटनीतिक वातावरण निर्माणमा समेत भूमिका खेल्न सक्छन् ।
रास्वपा सांसद दीपक बोहराले पनि प्रधानमन्त्रीको विदेश भ्रमणका क्रममा सम्बन्धित देशमा नेपाली राजदूतको उपस्थिति आवश्यक हुने धारणा राख्दै प्रस्तावित राजदूतहरूको नियुक्ति प्रक्रिया छिटो टुंग्याउनुपर्नेमा जोड दिनुभयो।
समितिले छलफलपछि असोज २६, २७ र २८ गते प्रस्तावित १३ जना राजदूतको संसदीय सुनुवाइ गर्ने कार्यतालिका तय गरेको छ ।
