बारामा अस्पताल उद्घाटन विवादले उग्ररूप लिदाँ प्रहरीको गोली लागेर एक बालक गम्भीर घाइतेबाराको फेटा गाउँपालिकामा नवनिर्मित १५ शय्याको अस्पताल उद्घाटनको विषयलाई लिएर भएको विवादले उग्र रूप लिँदा प्रहरीको गोली लागेर एक बालक गम्भीर घाइते भएका छन् ।
घाइते हुनेमा फेटा गाउँपालिका–३ निवासी १४ वर्षीय आदित्य पासवान रहेका छन् । उनको वीरगञ्जस्थित नेशनल मेडिकल कलेजमा उपचार भइरहेको छ । उपचारका क्रममा उनको शरीरबाट गोली निकालिएको जनाइएको छ ।
अस्पतालको भवन निर्माण भए पनि विद्युत्, फर्निचरलगायत आवश्यक पूर्वाधारको काम पूरा नभएको भन्दै स्थानीयवासीले अधुरो भवन उद्घाटन गर्न नहुने माग राख्दै बिहानैदेखि विरोध प्रदर्शन गरेका थिए ।
गाउँपालिका अध्यक्ष रुस्तम अन्सारीले स्थानीयको विरोधका बाबजुद पनि अस्पताल उद्घाटन गर्ने अडान लिएपछि विवाद बढ्दै गएको थियो । दुवै पक्षबीच तनाव बढेपछि स्थिति नियन्त्रणमा लिन प्रहरीले बल प्रयोग गरेको थियो । सोही क्रममा स्थानीयवासी र प्रहरीबीच झडप हुँदा प्रहरीले चलाएको गोली लागेर बालक पासवान गम्भीर घाइते भएका हुन् ।
बालकलाई गोली लागेपछि थप आक्रोशित भएका स्थानीयवासीले नौवटा मोटरसाइकलमा आगजनी गरेका छन् । थप विवाद बढेपछि फेटा क्षेत्रको अवस्था तनावपूर्ण बनेको छ ।
घटनापछि सुरक्षा अवस्था नियन्त्रणमा लिन जिल्ला सुरक्षा समितिको बैठक बसिरहेको छ । भने अस्पतालको अधुरो पूर्वाधारकै अवस्थामा उद्घाटन गर्न खोजिएको विषयले सुरु भएको विवाद गोली प्रहार, बालक घाइते र सवारीसाधनमा आगजनीसम्म पुगेपछि स्थानीय आक्रोशित बनेका छन् ।
