बाराको फेटा गाउँपालिकामा निर्माण भएको १५ शय्याको अस्पताल उद्घाटन गर्ने विषय अहिले राजनीतिक विवादको कारण बनेको छ । अस्पतालको भवन निर्माण भए पनि विद्युत्, फर्निचरलगायत आवश्यक पूर्वाधार पूरा नभएको भन्दै स्थानीयवासीले अधुरो अस्पताल उद्घाटन गर्न नहुने माग राख्दै आएका थिए ।
तर शनिबार राष्ट्रिय स्वतन्त्र पार्टीकी प्रतिनिधिसभा सदस्य समीक्षा बास्कोटा अस्पताल उद्घाटन गर्न फेटा पुगेपछि विवादले उग्र रूप लिएकाे छ । यो विवादको जरो भने अस्पताल निर्माणको सुरुवात र त्यसको जस कसले लिने भन्ने विषयसँग जोडिएको देखिन्छ ।
अस्पताल निर्माणको काम तत्कालीन गाउँपालिका अध्यक्ष तथा नेकपा एमालेबाट निर्वाचित अमिरीलाल साह कानुको कार्यकालमा सुरु भएको थियो । अहिले गाउँपालिका अध्यक्ष रुस्तम अन्सारी रास्वपासँग आबद्ध छन् ।
प्रशासनका अनुसार अस्पताल उद्घाटनका क्रममा शिलालेखमा रहेको नाम हटाउने विषयलाई लिएर समेत विवाद भएको थियो । एमालेका स्थानीय नेता तथा कार्यकर्ताले उद्घाटन कार्यक्रम बिथोल्ने चेतावनी दुई दिनअघि नै जिल्ला प्रशासन कार्यालयलाई दिएका थिए । शनिबार निवर्तमान अध्यक्षको नेतृत्वमा करिब २५० जनाको समूह कार्यक्रमस्थल पुगेपछि विवाद झडपमा परिणत भएको मधेश प्रदेश प्रहरीको भनाइ रहेकाे छ ।
झडप नियन्त्रणमा लिन प्रहरीले बल प्रयोग गर्दा प्रहरीको गोली लागेर १५ वर्षीय आदित्य पासवान घाइते भए । उनको तिघ्रामा गोली लागेको छ । ढुंगामुढा लागेर पाँच जना प्रहरीसमेत घाइते भएका छन् । घटनाका क्रममा अस्पतालमा तोडफोड हुनुका साथै १० वटा मोटरसाइकलमा आगजनी गरेको छ ।
अस्पताल कसले निर्माण गर्यो, उद्घाटन कसले गर्ने र शिलालेखमा कसको नाम रहने भन्ने विवादले अन्ततः जनताको स्वास्थ्य सेवाका लागि बनेको अस्पताललाई नै राजनीतिक द्वन्द्वको केन्द्र बनाएको छ । तर यहाँ गम्भीर प्रश्न उठाएकाे छ – अस्पताल उद्घाटनको जस लिने प्रतिस्पर्धामा जनताको स्वास्थ्य सेवा किन ओझेलमा पर्यो ? अधुरो पूर्वाधार पूरा गरेर अस्पताल सञ्चालन गर्ने जिम्मेवारी कसले लिने ? र एक १५ वर्षीय बालकमाथि गोली चल्ने अवस्थासम्म विवाद कसरी पुग्यो ?
यी प्रश्नको जवाफ गाउँपालिका नेतृत्व, निवर्तमान नेतृत्व र सम्बन्धित सुरक्षा निकायले दिनुपर्ने देखिन्छ ।
