रौतहट । चाडपर्वको समयमा हुन सक्ने चोरी, लुटपाट, ठगी, पाकेटमारी तथा सवारी दुर्घटनालाई नियन्त्रण गर्न रौतहट प्रहरीले जिल्लाभर सुरक्षा व्यवस्था कडा बनाउने भएको छ । दशैं, तिहार र छठ पर्वलाई लक्षित गर्दै प्रहरीले ८९७ जना प्रहरी जनशक्ति परिचालन गर्ने विशेष सुरक्षा योजना अघि सारेको छ ।
जिल्ला प्रहरी कार्यालय रौतहटका प्रहरी प्रमुख प्रहरी उपरीक्षक (एसपी) सिताराम रिजालका अनुसार चाडपर्वमा मानिसको आवागमन बढ्ने, आर्थिक कारोबार तीव्र हुने तथा बजार क्षेत्रमा भीडभाड बढ्ने भएकाले सुरक्षा चुनौतीलाई मध्यनजर गर्दै विशेष योजना बनाइएको हो। उक्त सुरक्षा योजनामा ट्राफिक प्रहरीसमेत परिचालन हुनेछन् ।
जिल्ला प्रहरी प्रवक्ता वसन्त गौतमका अनुसार सुरक्षा व्यवस्थालाई प्रभावकारी बनाउन नियमित गस्ती, मोबाइल गस्ती, पैदल गस्ती, सीसीटीभी क्यामेरा तथा ड्रोन प्रविधिको प्रयोग गरिनेछ। साथै, सम्भावित आपराधिक गतिविधि नियन्त्रणका लागि गोप्य निगरानीसमेत बढाइनेछ ।
३४ स्थानमा प्रहरी पिकेट, २४ घण्टा निगरानी
प्रहरीले जिल्लाका ३४ स्थानमा पिकेट स्थापना गरी सुरक्षा व्यवस्था मिलाउने भएको छ। त्यसैगरी, २० स्थानमा पैदल गस्ती र १४ वटा मोबाइल गस्ती परिचालन गरिनेछ ।
संवेदनशील क्षेत्रको निगरानीका लागि सीसीटीभी क्यामेरा र ड्रोन प्रविधिको समेत प्रयोग गरिने प्रहरीले जनाएको छ । मुख्य बजार, मेला, जात्रा, धार्मिक स्थल तथा बढी भीडभाड हुने क्षेत्रलाई विशेष निगरानीमा राखिनेछ ।
सम्भावित अपराध तथा दुर्घटना हुन सक्ने जोखिमयुक्त स्थान पहिचान गरी नियमित र आकस्मिक गस्ती बढाउने प्रहरीको योजना छ ।
बैंक तथा सुनचाँदी पसलमा विशेष सुरक्षा
चाडपर्वको समयमा बैंक तथा वित्तीय संस्था, सुनचाँदी पसल र आर्थिक कारोबार हुने स्थानमा चोरी तथा लुटपाटको जोखिम बढ्ने भएकाले त्यस्ता क्षेत्रलाई संवेदनशील सूचीमा राखिएको छ ।
चोरी, पाकेटमारी, ठगी तथा लुटपाटमा संलग्न हुन सक्ने व्यक्तिहरूमाथि निगरानी गर्न सादा पोशाकमा समेत प्रहरी परिचालन गरिनेछ । अदालतको फैसला कार्यान्वयनका क्रममा फरार रहेका प्रतिवादी पक्राउ गर्ने अभियानलाई पनि सुरक्षा योजनामा समेटिएको छ ।
सीमावर्ती क्षेत्रमा तालिमप्राप्त कुकुरसहित प्रहरी परिचालन
दशैं, तिहार र छठ मनाउन भारतबाट नेपाल फर्किने नेपाली नागरिकको सुरक्षालाई पनि प्रहरीले प्राथमिकतामा राखेको छ । यसका लागि सीमावर्ती भारतीय प्रहरी इकाइसँग समन्वय गरी यात्रुलाई ठगी तथा लुटपाटबाट जोगाउने व्यवस्था मिलाइनेछ ।
जिल्लाका पाँच स्थानमा यात्रु सहायता कक्ष स्थापना गरिनेछ । सीमावर्ती क्षेत्रमा पटाका तथा अन्य अवैध सामग्रीको ओसारपसार नियन्त्रण गर्न तालिमप्राप्त कुकुरसहित प्रहरी टोली परिचालन गरिने प्रहरीले जनाएको छ ।
त्यसैगरी, बसपार्क तथा प्रमुख यातायात केन्द्रमा प्रहरीको उपस्थिति बढाएर सार्वजनिक सवारीसाधनमा हुने चोरी, ठगी तथा यात्रुमाथि हुने दुर्व्यवहार नियन्त्रण गरिनेछ ।
मापसे र लापरवाहीपूर्ण सवारी सञ्चालनमाथि कडाइ
चाडपर्वका बेला हुन सक्ने सवारी दुर्घटना न्यूनीकरण गर्न ट्राफिक प्रहरीसहित जिल्लाका १० स्थानमा संयुक्त चेकजाँच सञ्चालन गरिनेछ ।
मादक पदार्थ सेवन गरी सवारी चलाउने, क्षमताभन्दा बढी यात्रु बोक्ने तथा लापरवाहीपूर्वक सवारी सञ्चालन गर्ने चालकलाई नियन्त्रणमा लिन विशेष निगरानी गरिने प्रहरीले जनाएको छ ।
त्यस्तै, सामाजिक सञ्जालमार्फत फैलिन सक्ने अफवाह, भ्रामक तथा उत्तेजनात्मक सामग्रीमाथि पनि प्रहरीले निगरानी बढाउने भएको छ । यस्ता गतिविधिबाट सामाजिक सद्भाव तथा शान्ति सुरक्षामा असर पर्न नदिन चौबीसै घण्टा प्रहरी परिचालन गरिने जिल्ला प्रहरी कार्यालयले जनाएको छ ।
सहयोग गर्न प्रहरीको आग्रह
जिल्ला प्रहरी कार्यालय रौतहटले चाडपर्वलाई शान्तिपूर्ण र सुरक्षित वातावरणमा मनाउन नागरिक, व्यवसायी, यातायात व्यवसायी तथा सम्पूर्ण सरोकारवालासँग सहयोगको अपिल गरेको छ ।
प्रहरीले कुनै शंकास्पद गतिविधि, व्यक्ति वा आपराधिक घटना देखिए तत्काल प्रहरी कन्ट्रोल नम्बर १०० वा सञ्चार नम्बर ९८५५०९०३७४ मा सम्पर्क गर्न आग्रह गरेको छ ।
त्यस्तै, प्रहरी सूचना अधिकारीको नम्बर ९८५५०४०६०७ र जिल्ला प्रहरी कार्यालय प्रमुखको नम्बर ९८५५०३५५५५ मा समेत जानकारी गराउन सकिने जनाएको छ ।
चाडपर्वलाई भयमुक्त र सुरक्षित बनाउन प्रहरीले अघि सारेको सुरक्षा योजना प्रभावकारी रूपमा कार्यान्वयन हुनुका साथै नागरिकको सतर्कता र सहकार्य पनि उत्तिकै महत्त्वपूर्ण देखिन्छ ।