ढाका । बंगलादेशमा राजनीतिक हिंसा, आगजनी र आक्रमणका घटना बढ्दै गएपछि सरकारले सुरक्षा व्यवस्था कडा बनाएको छ । हिंसात्मक गतिविधि नियन्त्रण गर्न शनिबार देशभर सयौं अतिरिक्त अर्धसैनिक बल परिचालन गरिएको छ।
पूर्वप्रधानमन्त्री शेख हसिनाका समर्थकका घरमा आगजनी, प्रहरी चौकी तथा बैंकमा आक्रमण र विपक्षी दलका समर्थकका घर जलाउने घटना बढेपछि सरकारले सुरक्षा बल थप गरेको हो ।
सन् २०२४ को जनविद्रोहपछि सत्ताच्युत भएकी ७९ वर्षीया पूर्वप्रधानमन्त्री हसिना हाल भारतमा निर्वासनमा हुनुहुन्छ । मानवताविरुद्धको अपराधमा उहाँलाई अनुपस्थितिमै मृत्युदण्डको सजाय सुनाइएको थियो । आगामी डिसेम्बरमा स्वदेश फर्कने घोषणा गरेपछि बंगलादेशमा राजनीतिक तनाव थप चर्किएको हो ।
सरकारी समाचार संस्था बीएसएसका अनुसार देशभर बोर्डर गार्ड बंगलादेश (बीजीबी) का थप ९० प्लाटुन परिचालन गरिएको छ ।
प्रहरी प्रमुख मोहम्मद अली हुसेन फकिरले हसिनाको गृहनगर गोपालगन्जको सुरक्षा अवस्था सामान्य भइसकेको बताउनुभएको छ । उहाँले विध्वंसात्मक गतिविधिविरुद्ध एकजुट हुन सर्वसाधारणलाई आग्रहसमेत गर्नुभएको छ ।
यसैगरी, उचित जीवनयापनका लागि आवश्यक ज्यालाको माग गर्दै गार्मेन्ट उद्योगका मजदुरहरूले आन्दोलन गरिरहेका औद्योगिक क्षेत्रमा समेत सुरक्षा बलको उपस्थिति बढाइएको छ ।
सुरुमा हसिनाको अवामी लिग पार्टीका समर्थकहरूले गरेको आन्दोलन हिंसात्मक बनेपछि सत्तारूढ दलका नेताहरूलाई आन्दोलनकारीले निशाना बनाएका थिए ।
त्यसपछि बंगलादेश नेसनलिस्ट पार्टी (बीएनपी) का दुई कार्यकर्ताको हत्या भएको केही दिनमै आक्रोशित सत्तारूढ दलका समर्थकहरूले प्रतिशोधस्वरूप तोडफोड तथा आगजनी गरेका थिए ।
बंगलादेशमा पछिल्लो राजनीतिक घटनाक्रमसँगै हिंसा थप फैलिन सक्ने आशंकाका बीच सरकारले सुरक्षा व्यवस्था मजबुत बनाएको छ ।