पूर्वप्रधानमन्त्री डा. बाबुराम भट्टराईले नेपालमा जेन–जी आन्दोलन हुनुका तीन प्रमुख कारण रहेको बताएका छन् । भारत भ्रमणका क्रममा एक भारतीय टेलिभिजन च्यानल एनडीटीभीलाई दिएको अन्तर्वार्तामा उनले जेन–जी आन्दोलन र त्यसपछिको राजनीतिक परिस्थितिबारे आफ्नो धारणा राखेका हुन् ।
डा. भट्टराईले गत भदौमा भएको जेन–जी विद्रोहलाई स्वाभाविक र जायज भएको उल्लेख गर्दै यसको पछाडि गहिरा सामाजिक तथा आर्थिक कारणहरू रहेको बताए । जेन–जी आन्दोलनको पहिलो कारणका रूपमा उनले नेपालमा युवाहरूको व्यापक बेरोजगारी र गुणस्तरीय शिक्षाको अभावलाई औँल्याए । यी समस्याका कारण युवा वर्ग लामो समयदेखि असन्तुष्ट रहँदै आएको उनको भनाइ छ ।
सरकारी तहमा व्याप्त भ्रष्टाचारलाई उनले जेन–जी आन्दोलनको दोस्रो प्रमुख कारणका रूपमा चित्रण गरे । साथै, तत्कालीन सरकारले सामाजिक सञ्जालमाथि लगाएको प्रतिबन्धका कारण पनि ठूलो संख्यामा युवा सडकमा उत्रिएको उनले बताए ।
पूर्वप्रधानमन्त्री भट्टराईले जेन–जी प्रतिनिधि र सरकारबिच हालै भएको सम्झौताप्रति पनि प्रशंसा व्यक्त गरे । नेपालको कानुनअनुसार उम्मेदवार बन्न न्यूनतम उमेर सीमा २५ वर्ष तोकिएको भए पनि जेन–जी र सरकारबिच उक्त उमेर सीमा घटाएर २१ वर्ष बनाउने सहमति भएको उल्लेख गर्दै उनले यसले युवाहरूलाई संसदीय प्रक्रियामा सहभागी हुन सहज वातावरण बनाउने स्पष्ट पारे ।
डा. भट्टराईले पुराना राजनीतिक दलहरूबाट अब देशमा अपेक्षित सुधार सम्भव नरहेको धारणा व्यक्त गर्दै वैकल्पिक शक्तिका रूपमा नयाँ दलहरू उदाइरहेको बताए । आगामी निर्वाचनमा वैकल्पिक राजनीतिक शक्तिहरूबीच गठबन्धनको सम्भावना रहेको उनको भनाइ छ ।
अबको नेतृत्व युवा पुस्ताले लिनुपर्ने धारणा राख्दै डा. भट्टराईले युवाशक्तिलाई अघि बढाउन आफूहरू प्रतिबद्ध रहेको बताए ।
