काठमाडौं निर्वाचन क्षेत्र नम्बर १० पश्चिम नाकादेखि दक्षिणकाली, कीर्तिपुर र चन्द्रागिरि नगरपालिकासम्म फैलिएको क्षेत्र हो । फर्पिङ, दक्षिणकाली हुँदै छैमले र चुरे क्षेत्रसम्म पुगेपछि मात्रै यो निर्वाचन क्षेत्र समाप्त हुन्छ । यस क्षेत्रका मतदाताहरूले चुनावी उम्मेदवारहरू अझै घर-घर पुग्न नसके पनि आफूले भोगिरहेका समस्या र अपेक्षाका सूची तयार पारेका छन् ।
मतदाताका गुनासोका सूची लामो छन् । बागमतीको पानी सिँचाइको लागि प्रयोग नभएको, किसानका उत्पादनले उचित बजारभाउ नपाएको, विषादीको अत्यधिक प्रयोग, बेरोजगारी, र युवा पलायन जस्ता समस्या प्रमुख छन् । छैमले, राम्चेका ८० वर्षीय घननाथ चापागाईंले भने, “बागमती खेर गएको देख्दा मन रुन्छ । किसानका खेत सुकेका छन् । सिँचाइ योजना हुन्थ्यो भने यो हिउँदमा खेत बाँझै कहाँ रहन्थ्यो ।”
यस क्षेत्रको निर्वाचन क्षेत्र नम्बर समयसँगै परिवर्तन हुँदै आएको छ । २०४८ मा यो क्षेत्र नम्बर ५ थियो, २०५१ र २०५६ मा ७, र २०६४ देखि संविधानसभाको निर्वाचनमा यो क्षेत्र नम्बर १० बनेको हो । क्षेत्रका इतिहासमा मदन भण्डारी र पुष्पकमल दाहाल विजयी भइसकेका छन् ।
२०४६ पछि प्रजातन्त्र आएपछि यहाँका बस्तीमा जग्गा, बाटो, बिजुली, खानेपानी र सरसफाइका समस्या समाधान भए पनि सिँचाइ र निरन्तर खानेपानीको समस्या अझै रहिआएको छ । किसानहरू भने बजार, मलखाद, बीउ र पानी नपाएर दोहोरो मारमा परिरहेका छन् । शीतलचोकका बाबु तामाङले भने, “कुखुराको दाना महँगो भयो, तर बिक्री मूल्य सधैं न्यून छ । किसानको लगानी फिर्ता आउँदैन । बजार पूर्णरूपमा बिग्रिएको छ ।”
युवाहरूको रोजगारीको अवस्था पनि गम्भीर छ । दक्षिणकाली नगरपालिकामा भिसा सिफारिसका लागि दैनिक आउने युवाको संख्या बढ्दो छ । वडा अध्यक्ष अमृका बलामीले भने, “गाउँमा डिग्रीधारी धेरै छन्, तर क्षमता अनुसार रोजगारीमा समावेश हुन सकेका छैनन् । यसले युवा पलायन बढाइरहेको छ ।”
दक्षिणकालीबाट हेटौंडा जोड्ने सडक कालोपत्र भइसके पनि चार्जिङ स्टेशन र सवारी सुरक्षामा ध्यान दिन आवश्यक रहेको छ । कीर्तिपुरमा मेलम्चीको पानी वितरण योजना अधूरो छ । नगर प्रमुख कृष्णमान डंगोलले भने, “यहाँको मुख्य समस्या अस्पतालको छ । १५ शय्याको अस्पताल आवश्यक छ ।”
कृषक, शिक्षक र स्थानीय बुद्धिजीवीहरूले यो निर्वाचनमा उम्मेदवारहरूले रोजगारी, सुशासन, कृषि, सिँचाइ र बजार पहुँचलाई प्राथमिकता दिनुपर्नेमा जोड दिएका छन् । सेतीदेवी मावि शिक्षक रवि केसीले भने, “यहाँ समस्या धेरै छन् । किसानले मलखाद, बीउ, सिँचाइ र उचित मूल्य नपाउँदा उत्पादन टिक्दैन । युवा गाउँ छाड्दै छन् । अब काम गर्ने, दुःख पर्दा जनताको साथ दिने नेता चाहिन्छ ।”
काठमाडौं-१० मा २५ जना उम्मेदवार प्रत्यक्ष मैदानमा छन् । १५ राजनीतिक दल र १० स्वतन्त्र उम्मेदवार रहेका छन्, जसमा ५ महिला छन् । निर्वाचन क्षेत्रका ४७ मतदानस्थल र ९८ मतदान केन्द्र छन् । एमालेले विनोद श्रेष्ठ, कांग्रेसले हिमाल कार्की, नेकपाले रूपा महर्जन, र रास्वपाले प्रदीप विष्टलाई उम्मेदवार बनाएका छन् ।
उम्मेदवारहरूले रोजगार, सुशासन, शिक्षा, स्वास्थ्य, सिँचाइ, सडक र कृषकका समस्यालाई प्राथमिकतामा राख्ने प्रतिवद्धता व्यक्त गरेका छन् । मतदाता भने यसपालि पुराना वाचा भन्दा वास्तविक कार्य र समस्याको समाधान खोजिरहेका छन् ।
.jpg-2-1769587845.jpg)
