चितवनमा आयोजित राष्ट्रिय गाई प्रदर्शनी प्रतियोगितामा रत्ननगरस्थित कामना कृषि तथा पशुपक्षी फर्मका अर्जुन ढकालको गाई सर्वोत्कृष्ट घोषित भएको छ । उक्त गाईले ४०० पूर्णाङ्कमध्ये ३६२.५ अंक प्राप्त गर्दै प्रथम स्थान हासिल गरेको हो ।
दूध उत्पादनमा अग्रणी मानिएको चितवनमा पहिलो पटक प्रतिस्पर्धात्मक मूल्याङ्कनसहित गाई प्रदर्शनी आयोजना गरिएको हो ।
भरतपुरस्थित चितवन प्रदर्शनी केन्द्रमा जारी अन्तर्राष्ट्रिय डेरी प्रदर्शनी–२०८२ अन्तर्गत बुधबार सम्पन्न प्रतियोगितामा विभिन्न नश्लका गाईलाई एकै स्थानमा भेला गरी पशु विज्ञहरूले स्वास्थ्य अवस्था, दूध उत्पादन क्षमता, शारीरिक बनावट, हिँडाइ तथा प्रजननयोग्यता लगायतका आधारमा मूल्याङ्कन गरेका थिए । चार सदस्यीय निर्णायक समूहले अंक प्रदान गरेको थियो ।
प्रतियोगितामा शिवानी कृषि तथा पशुपक्षी फर्मका सञ्चालक शिवप्रसाद पौडेलको गाई ३५३.५ अंकसहित दोस्रो स्थानमा रह्यो भने कालिका पशु विकास केन्द्रका सञ्चालक चेतप्रसाद ढकालको गाई ३५२.५ अंकसहित तेस्रो भयो । नोभा कृषि फर्मका सञ्चालक पदम तिवारीको गाई सान्त्वना स्थानमा परेको छ ।
प्रतियोगिताका प्रमुख निर्णायक कृषि तथा वन विज्ञान विश्वविद्यालय, रामपुरका एसोसिएट प्रोफेसर डा. गोकर्ण गौतम रहेका थिए। त्यसैगरी गाई अनुसन्धान कार्यक्रम रामपुरका विज्ञ डा. उद्धव पनेरु, किसान आयोगका वरिष्ठ पशु विकास अधिकृत डा. खगेन्द्र सापकोटा तथा अमेरिकी पशु विज्ञ डेनियल ली लेनी निर्णायक सदस्य रहेका थिए ।
प्रतियोगितामा सहभागी १७ वटा विभिन्न फर्मका गाईको स्वास्थ्य अवस्था, जातअनुसारको शारीरिक बनावट, हिँडाइ, दूध उत्पादन क्षमता तथा प्रजननयोग्यता लगायतका आधारमा मूल्याङ्कन गरिएको थियो । अन्य गाईको अंक पनि निकै नजिकै रहेको निर्णायक मण्डल संयोजक डा. गौतमले बताए ।
कार्यक्रममा आयोजक चितवन जिल्ला दुग्ध उत्पादक सहकारी संघ लिमिटेडका अध्यक्ष किशोर बगालेले नेपालमा गाई प्रतियोगिता नयाँ अभ्यास भएको उल्लेख गर्दै आगामी दिनमा पनि निरन्तरता दिइने जानकारी दिए ।
‘डेरी उद्योगमा प्रविधि, अर्थतन्त्रमा समृद्धि’ भन्ने नारासहित चितवन उद्योग संघ र चितवन जिल्ला दुग्ध उत्पादक सहकारी संघ लिमिटेडको संयुक्त आयोजनामा सञ्चालन भएको अन्तर्राष्ट्रिय डेरी एक्स्पो–२०८२ आज समापन हुँदैछ ।
