नेपाली कांग्रेसको केन्द्रीय कार्यसमितिको बैठक पार्टी केन्द्रीय कार्यालय सानेपामा जारी रहेको छ ।
बैठकमा पार्टीको १५औँ महाधिवेशन आह्वान गर्ने विषय प्रमुख एजेन्डाका रूपमा छलफल भइरहेको जनाइएको छ । कांग्रेसले आगामी भदौ २४ गते संस्थापक नेता बीपी कोइरालाको जन्मजयन्तीको अवसर पारेर महाधिवेशन उद्घाटन गर्ने तयारी गरेको बताइएको छ ।
महाधिवेशनको मिति, तयारी र प्रक्रियाका विषयमा केन्द्रीय कार्यसमितिमा गहन छलफल भइरहेको छ । बैठकमा सभापति गगनकुमार थापाले सम्बोधन गर्दै आफ्नो हालैको राजीनामाबारे स्पष्टिकरण दिएका छन् । उनले आफू कुनै दबाबमा नभई स्वेच्छाले राजीनामा दिने निर्णयमा पुगेको बताएका छन् ।
थापाले निर्वाचन सम्पन्न भएसँगै राजीनामा दिन चाहेको भए पनि केही प्राविधिक कारणले प्रक्रिया ढिलाइ भएको उल्लेख गरे । उनले चैत ३ गते नै राजीनामाको विषय टुंग्याइसकेको जानकारी गराए ।
पार्टीभित्रका उपसभापति र महामन्त्रीहरूप्रति आफू जवाफदेही हुनुपर्ने महसुस गर्दै राजीनामा दिएको उनले बताए । यस अवधिमा पार्टी कार्यकर्ताबाट ठूलो माया, विश्वास र समर्थन प्राप्त भएको उल्लेख गर्दै उनले सबैप्रति आभार व्यक्त गरे ।
गत बुधबार सभापति थापाले दिएको राजीनामा आइतबार बसेको केन्द्रीय कार्यसमिति बैठकले अस्वीकृत गरेको थियो । त्यसपछि मंगलबारको बैठकमा उनी सहभागी भई आफ्नो धारणा राखिरहेका हुन् ।
सभापति थापाले महाधिवेशनको समयसीमा, तयारी प्रक्रिया र व्यवस्थापनसम्बन्धी विभिन्न प्रस्तावहरू समेत बैठकमा प्रस्तुत गर्ने जानकारी दिएका छन् ।
