जेनजी आन्दोलनपछि विकसित नेपालको पछिल्ला राजनीतिक घटनाक्रमलाई अन्तर्राष्ट्रिय सञ्चारमाध्यमहरूले उच्च प्राथमिकतासाथ कभर गरिरहेका छन् । पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकको गिरफ्तारीदेखि लिएर नयाँ राजनीतिक नेतृत्व र संक्रमणकालीन अवस्थासम्मका विषयमा विश्वका प्रमुख मिडियाले विभिन्न कोणबाट विश्लेषण गरेका छन् ।
भदौ २३ र २४ गते भएको जेनजी आन्दोलनका क्रममा भएको हिंसा र १९ जनाको मृत्युका घटनासँग सम्बन्धित जिम्मेवारीबारे छानबिन आयोगको सिफारिसपछि ओली र लेखकलाई प्रहरीले पक्राउ गरेको विषयलाई अन्तर्राष्ट्रिय मिडियाले विशेष चासोका साथ प्रस्तुत गरेका छन् ।
बीबीसीले नेपालको पछिल्लो राजनीतिक घटनाक्रमलाई “ऐतिहासिक न्यायको मोड” का रूपमा व्याख्या गर्दै विशेष रिपोर्ट प्रकाशित गरेको छ । सो रिपोर्टमा आन्दोलनका क्रममा भएको दमन र त्यसपछिको राजनीतिक परिवर्तनलाई जोड दिइएको छ । साथै नयाँ नेतृत्वको उदयलाई “युवा विद्रोहको परिणाम” को रूपमा चित्रण गरिएको उल्लेख छ ।
रोयटर्सले आफ्नो रिपोर्टमा ओली र लेखकको गिरफ्तारीलाई छानबिन आयोगको सिफारिस र कानुनी जवाफदेहितासँग जोड्दै विश्लेषण गरेको छ । रिपोर्टमा आन्दोलनका क्रममा भएको घातक गोलीकाण्ड रोक्न तत्कालीन नेतृत्व असफल भएको आरोपसमेत उल्लेख गरिएको छ ।
अलजजिराले नेपालको संक्रमणकालीन राजनीतिमा नयाँ नेतृत्वको उदय र त्यसले सामना गर्नुपर्ने चुनौतीबारे विश्लेषण गर्दै वर्तमान सरकारलाई जेनजी आन्दोलनको उत्तराधिकारीका रूपमा चित्रण गरेको छ ।
त्यसैगरी द गार्डियन, द वासिङ्टन पोस्ट र डि डब्लु लगायतका सञ्चारमाध्यमहरूले पनि ओलीको गिरफ्तारीलाई “जवाफदेहिता,” “लोकतान्त्रिक संक्रमण,” र “न्यायिक परीक्षण” को दृष्टिकोणबाट प्रस्तुत गरेका छन् ।
भारतीय सञ्चारमाध्यमहरूले भने नेपालको घटनाक्रमलाई क्षेत्रीय सुरक्षा, सीमा प्रभाव, व्यापार र भूराजनीतिक सन्तुलनसँग जोडेर विस्तृत रूपमा विश्लेषण गरेका छन् । अधिकांश रिपोर्टमा आन्दोलन, राजनीतिक परिवर्तन र नयाँ नेतृत्वको उदयलाई प्राथमिकताका साथ प्रस्तुत गरिएको छ ।
समग्रमा, अन्तर्राष्ट्रिय मिडियाहरूले नेपालको पछिल्लो राजनीतिक घटनाक्रमलाई केवल आन्तरिक परिवर्तनका रूपमा मात्र नभई दक्षिण एसियाली राजनीतिक परिदृश्यमा देखिएको महत्वपूर्ण मोडका रूपमा व्याख्या गरेका छन् ।
-1772177803.jpg)
