जिल्ला प्रशासन कार्यालय सप्तरीले खाना पकाउने एलपी ग्यास लुकाएर कृत्रिम अभाव सिर्जना गर्ने तथा तोकिएको मूल्यभन्दा बढीमा बिक्रीवितरण गर्ने डिलर र व्यवसायीलाई कारबाही गर्ने चेतावनी दिएको छ ।
सहायक प्रमुख जिल्ला अधिकारी नरेशकुमार यादवले सोमबार जारी गरेको सूचनामा जिल्लाका ग्यास डिलर तथा व्यवसायीले उद्योग वा डिलरबाट ग्यास ल्याई सहज रूपमा बिक्रीवितरण नगरी लुकाइछिपाइ राख्ने तथा तोकिएको मूल्यभन्दा बढी रकम लिएर होटल, व्यवसायी र उपभोक्तालाई बिक्री गर्ने गरेको गुनासो प्राप्त भएको उल्लेख छ ।
प्रशासनका अनुसार नियमित ग्राहकको मागलाई बेवास्ता गर्ने, पहुँच र चिनजानका आधारमा ग्यास बिक्री गर्ने, मूल्यसूची नराख्ने तथा बिक्री बिल नदिने र बिल–बिजक नराख्ने जस्ता गुनासोसमेत प्राप्त भएका छन् । त्यस्तै, ग्यास सिलिन्डर भण्डारण गरी लुकाएर कृत्रिम अभाव सिर्जना गर्ने तथा दर्ता वा अनुमति नभएका विक्रेतालाई डिलरले ग्यास उपलब्ध गराउने कार्य नगर्न प्रशासनले निर्देशन दिएको छ ।
जिल्ला प्रशासन कार्यालयले यस्ता कार्य प्रचलित कानुनविपरीत भएको भन्दै कानून उल्लङ्घन गरेको पाइएमा सम्बन्धित व्यक्ति, डिलर तथा विक्रेतामाथि कालोबजार तथा केही अन्य सामाजिक अपराध तथा सजाय ऐन, २०३२, उपभोक्ता संरक्षण ऐन, २०७५ तथा अन्य प्रचलित कानुनबमोजिम कारबाही गरिने जनाएको छ ।
प्रशासनले लुकाइछिपाइ राखिएको ग्यास सिलिन्डरसमेत जफत गरिने स्पष्ट पारेको छ । साथै, उपभोक्तालाई सहज र निर्धारित मूल्यमा ग्यास उपलब्ध गराउन तथा बिक्रीवितरणमा पारदर्शिता कायम गर्न जिल्लाका सबै ग्यास डिलर तथा व्यवसायीलाई निर्देशन दिइएको छ ।
