जनकपुरधाम । मधेस प्रदेशका गृहमन्त्री फकिरा महतोको नेतृत्वमा गएको टोलीले जनकपुरधाम–१० देवीचोकस्थित राजीव डेरी फार्ममा छड्के अनुगमन गरेको छ ।
अनुगमनका क्रममा करिब २५ किलो मिठाई नष्ट गरिएको छ । गृहमन्त्री महतोसहितको टोली बुधबार आधा दर्जनभन्दा बढी सवारीसाधनमा डेरी फार्म पुगेको थियो । टोलीले डेरीमा उत्पादन तथा बिक्री भइरहेको दूध, दही, रसभरी, लालमोहन, छेना, पनिरलगायत खाद्य सामग्रीको अवस्था र गुणस्तरबारे निरीक्षण गरेको थियो ।
अनुगमनका क्रममा सुरक्षाकर्मीले डेरी फार्मलाई घेराउ गर्नुका साथै केही समय आवतजावतमा समेत रोक लगाएका थिए। ठूलो संख्यामा सुरक्षाकर्मी परिचालन गरिएपछि देवीचोक क्षेत्रमा केही समय भिडभाडसमेत भएको थियो ।
डेरी सञ्चालक राजीव यादवका अनुसार गृहमन्त्रीसहितको टोलीले दूध तथा मिठाईमा मिसावट हुने गरेको जनगुनासो आएको भन्दै उत्पादन तथा बिक्री भइरहेका सामग्री देखाउन आग्रह गरेको थियो। निरीक्षणका क्रममा करिब २५ किलो रसभरी र लालमोहन नष्ट गर्न लगाइएको यादवले बताए ।
यादवका अनुसार नष्ट गरिएको मिठाईको मूल्य करिब २५ हजार रुपैयाँ बराबर रहेको छ। उनले आफूले उत्पादन गर्दै आएका डेरीजन्य सामग्रीमा गम्भीर गुणस्तर समस्या नभए पनि मिठाई तयार गर्ने स्थानमा सरसफाइ कमजोर देखिएपछि टोलीले सरसफाइमा विशेष ध्यान दिन निर्देशन दिएको बताए ।
उनले पसलमा सयौँ लिटर दूध, दही तथा अन्य मिठाई रहेको र सबै सामग्रीमा कैफियत भेटिएको भए अन्य सामग्री पनि नष्ट गरिने अवस्था हुने बताए । उनका अनुसार मिठाई तयार गर्ने भान्सानजिक रहेका दुई वटा नादमा राखिएको रसभरी र लालमोहन मात्र नष्ट गर्न लगाइएको हो ।
राजीव डेरी फार्मले दैनिक एक सय लिटरभन्दा बढी दूध बिक्री गर्दै आएको तथा दूधबाट उत्पादित दही, पनिर, मिठाईलगायत सामग्री बिक्री–वितरण गर्दै आएको सञ्चालकको भनाइ छ ।
स्थानीय दीपक लाभका अनुसार अनुगमनका क्रममा डेरीलाई सुरक्षाकर्मीले घेरिएको देखेपछि आफू घटनाबारे बुझ्न त्यहाँ पुगेका थिए । उनका अनुसार उक्त डेरीमा उत्पादित मिठाईमा मिसावट हुने गरेको गुनासो स्थानीयस्तरमा विगतमा पनि सुनिँदै आएको थियो ।
करिब आधा घण्टा निरीक्षण गरेपछि गृहमन्त्री महतो नेतृत्वको टोली डेरीबाट फर्किएको थियो। अनुगमनका क्रममा नष्ट गरिएको मिठाईको गुणस्तरसम्बन्धी औपचारिक परीक्षणको विवरण भने सार्वजनिक भएको छैन ।
