मानवसेवा आश्रम वीरगञ्ज शाखाले आफ्नो ९ औँ वार्षिक उत्सव समारोह मनाइ रहेका छन् ।
२०७४ साल जेठ १५ गते नारायणी अस्पतालबाट ‘शंकर’ नाम गरेका एक सहयोगापेक्षी व्यक्तिको उद्धार गर्दै औपचारिक रूपमा सुरु भएको यो शाखाले नौ वर्षको अवधिमा उल्लेखनीय सामाजिक सेवा प्रदान गरेको छ ।
स्थापनाकालको प्रारम्भिक उद्धार कार्यमा संस्थापक देवेश गुप्ता, तत्कालीन प्रमुख जिल्ला अधिकारी केशव प्रसाद घिमिरे, डा. दीपक शाक्य, मीनाक्षी गुप्ता, रहबर अन्सारी, उषा शाह, कनिका कौशिक, मायामितु न्यौपाने, मुकेश खेतान, कमल चौगाईं, युवराज केसरी, आशिष श्रेष्ठ, रिशव अग्रवाल, संगीता शाक्य, लाल बहादुर गुरुङ, विजय ठाकुर तथा अंशु कार्की लगायतको सहभागिता रहेको थियो ।
स्थापना कालदेखि २०७९ सालसम्म वीरगञ्ज–९, इन्डियन एम्बेसी पछाडि भाडाको घरमा सञ्चालन भएको आश्रम हाल २०८० सालदेखि वीरगञ्ज–२५ श्रीसियामा प्रदेश सांसद रमेश पटेलको पहलमा प्राप्त भवनमा व्यवस्थित रूपमा सञ्चालन भइरहेको छ । साथै वीरगञ्ज–१५ लक्ष्मणवामा महानगरपालिकाले उपलब्ध गराएको १४ कठ्ठा जग्गामा करिब २० करोड रुपैयाँ लागतमा आधुनिक सुविधा सम्पन्न भवन निर्माण कार्यसमेत अघि बढिरहेको मानव सेवाले जनाएकाे छ ।
उद्धार र पुनर्स्थापनामा महत्वपूर्ण उपलब्धि
आश्रमको तथ्यांकअनुसार स्थापना कालदेखि हालसम्म कुल ३४२ जना सहयोगापेक्षी व्यक्तिको उद्धार गरिएको छ ।
तीमध्ये १५९ जनाको पारिवारिक पुनर्मिलन, ३३ जनाको सामुदायिक पुनर्स्थापना गरिएको छ भने ६५ जनालाई अन्य शाखामा स्थानान्तरण गरिएको छ । यस अवधिमा ४१ जनाले आश्रममै निधन भएको र हाल श्रीसियास्थित आश्रममा ४४ जना आश्रित रहेको जनाइएको छ ।
मानवसेवा आश्रमले हाल देशका ७ प्रदेशका २२ जिल्लामा ३४ वटा सेवा केन्द्रमार्फत सडकआश्रित, घरपरिवारविहीन तथा सहयोगापेक्षी मानवको उद्धार, उपचार, पालनपोषण र पुनर्मिलनको कार्य गर्दै आएको छ ।
“मानवमुक्त नेपाल” लक्ष्य
आश्रमका संस्थापक देवेश गुप्ताले मानवसेवा आश्रम कुनै एक व्यक्तिको नभई सम्पूर्ण पर्सा–बारावासीको माया, सहयोग र योगदानबाट सञ्चालन भइरहेको बताए ।
उनले भने, “यो संस्था कुनै डोनर वा ठूलो आर्थिक स्रोतबाट चलेको होइन, यहाँ श्रमिकदेखि उद्योगपति, व्यापारी, विद्यार्थी र गृहिणी सबैको सानो–ठूलो योगदानले सेवा निरन्तर भइरहेको छ।” उनका अनुसार आश्रमको दीर्घकालीन लक्ष्य “घरपरिवारविहीन, बेसहारा तथा सहयोगापेक्षी मानवमुक्त नेपाल” निर्माण गर्नु रहेको छ ।
सामाजिक सेवामा निरन्तरता
मानवसेवा आश्रम २०६९ सालदेखि सामाजिक सेवामा सक्रिय रहँदै २०७३ सालमा काठमाडौं जिल्ला प्रशासन कार्यालयमा विधिवत दर्ता भई सञ्चालनमा आएको हो । संस्थाले सडकपेटी तथा सार्वजनिक स्थानमा कष्टकर जीवन बिताइरहेका व्यक्तिहरूको उद्धार गरी सुरक्षित आवास, उपचार तथा पारिवारिक पुनर्मिलन गर्दै आएको छ ।
कार्यक्रममा आश्रम परिवारले विगत ९ वर्षदेखि निरन्तर साथ, सहयोग र विश्वास प्रदान गर्ने सम्पूर्ण वीरगञ्जवासी, शुभेच्छुक तथा सहयोगी मनहरूप्रति आभार प्रकट गरेको छ ।
सम्बन्धित समाचार
