सर्लाही । सर्लाहीको मलंगवास्थित श्रीमती कृष्णादेवी जनता माध्यमिक विद्यालयका तत्कालीन प्रधानाध्यापक र एक शिक्षकविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ ।
विद्यालयमा अनुपस्थित शिक्षकको फर्जी हाजिरी बनाएर गैरकानुनी रूपमा तलब निकासा गरी सरकारी रकम हिनामिना गरेको अभियोगमा अख्तियारले मंगलबार विशेष अदालत, काठमाडौंमा आरोपपत्र दायर गरेको हो ।
मुद्दा दायर गरिएकामा विद्यालयका तत्कालीन प्रधानाध्यापक विन्देश्वर यादव र तत्कालीन प्राथमिक द्वितीय श्रेणीकी शिक्षक प्रियंका कुमारी सिंह रहेका छन् ।
अख्तियारले दुवै प्रतिवादीसँग जनही ३ लाख ७१ हजार ३६ रुपैयाँ १० पैसा बिगो कायम गरी कानुनबमोजिम सजायको मागदाबी गरेको आयोगका प्रवक्ता सुरेश न्यौपानेले जानकारी दिनुभयो ।
यसरी भएको थियो हिनामिना
अख्तियारका अनुसार शिक्षक प्रियंका कुमारी सिंह विसं २०७९ वैशाखदेखि कात्तिक १८ गतेसम्म कुनै औपचारिक सूचना वा निवेदन नदिई विद्यालयमा निरन्तर अनुपस्थित रहेकी थिइन् ।
शिक्षा ऐनअनुसार मनासिब कारणबिना लामो समयसम्म अनुपस्थित रहने शिक्षकलाई पदबाट हटाउने प्रक्रिया अघि बढाउनुपर्ने भए पनि तत्कालीन प्रधानाध्यापक यादवले हाजिरी रजिस्टर खाली राखेको अख्तियारको अनुसन्धानबाट खुलेको छ ।
लामो समयपछि शिक्षक सिंह विद्यालयमा उपस्थित भएपछि एकमुष्ट हाजिरी गराइएको र पछि उक्त हाजिरीमा टिपेक्स लगाई सच्याएर पुनः हाजिर गराइएको अख्तियारले जनाएको छ ।
सोही फर्जी हाजिरी र बिदाको अभिलेखका आधारमा प्रधानाध्यापक यादवले मलंगवा नगरपालिकाबाट गैरकानुनी रूपमा तलब निकासा गराएको आयोगको दाबी छ ।
अनुसन्धानका क्रममा शिक्षक सिंह अनुपस्थित रहेको अवधिको साउनदेखि कात्तिकसम्मको २ लाख ४० हजार ९१४ रुपैयाँ तथा वैशाख, जेठ र असार महिनाको १ लाख ३० हजार १२१ रुपैयाँ गरी कुल ३ लाख ७१ हजार ३६ रुपैयाँ गैरकानुनी रूपमा भुक्तानी लिएको र दिएको पुष्टि भएको अख्तियारले जनाएको छ ।
कैद र जरिवानाको मागदाबी
सरकारी कागजात सच्याई सरकारी रकम हिनामिना, हानि–नोक्सानी तथा दुरुपयोग गरेको पुष्टि भएको भन्दै प्रतिवादी यादव र सिंहविरुद्ध भ्रष्टाचार निवारण ऐन, २०५९ को दफा ११ र दफा १७ बमोजिमको कसुरमा मुद्दा दायर गरिएको अख्तियारले जनाएको छ ।
आयोगले दुवै प्रतिवादीबाट हिनामिना भएको ३ लाख ७१ हजार ३६ रुपैयाँ बिगो असुलउपर गरी कानुनबमोजिम कैद तथा जरिवाना सजाय गर्न मागदाबी गरेको छ ।
