हैजाले वीरगंज आक्रान्त भइरहेका बेला खानेपानी मन्त्री प्रदीप यादवविरुद्ध आक्रोश पोखेकै आधारमा हिरासतमा परेकी वीरगंजकी युवती किरण साहमाथि सत्ता र शक्तिको दुरुपयोग गरिएको आरोप लाग्न थालेको छ ।
शुक्रबार परिवारका बिरामी सदस्यको कुरुवा बसेकै अवस्थामा मन्त्री यादवसँग गुनासो राखेकी किरणलाई प्रहरी हिरासतमा पठाइएको थियो । त्यसपछि मंगलबार मन्त्री यादवकै निर्देशनमा जसपा निकट महिला नेतृहरूलाई उतारेर जिल्ला प्रहरी कार्यालय पर्सा अगाडि प्रदर्शनसमेत गरिएको छ । प्रदर्शनकारीलाई ओसारपसार गर्न मन्त्रीले सरकारी गाडीको दुरुपयोग गरेको आरोप समेत लागेको छ ।
जनता समाजवादी पार्टी (जसपा)का महिला नेतृ तथा खानेपानी संस्थानका पदाधिकारी मधुमाया यादव र सल्मा खातुनको नेतृत्वमा प्रदर्शन गरिएको थियो । दुबैलाई गत जेठमा मन्त्री यादवले तीन वर्षका लागि खानेपानी संस्थान सञ्चालक समिति सदस्यमा नियुक्त गरेका थिए । उनीहरूलाई राजनीतिक नियुक्ति पाएकै आधारमा सरकारी भत्ता खाने सुविधा छ ।
प्रदर्शनमा सहभागीहरूले “मन्त्री प्रदीप यादव जिन्दावाद”, “दोषीलाई कारबाही गर”, “खानेपानीमा राजनीति गर्न पाइँदैन” भन्ने नारा लगाएका थिए । प्रदर्शनपछि उनीहरूमध्ये केही ई-रिक्सा चढेर फर्किएका थिए भने केहीलाई लिन सरकारी गाडी आएको थियो ।
बा १ झ ९०२, बा २ झ २०४१ र बा २ झ २७ ७० नम्बरको तीन वटा सरकारी गाडीमा उनीहरू चढेका थिए । मुख्य सडकको पूर्वतर्फ रोकिएका सवारीसाधन प्रदर्शनकारीलाई लिएर दक्षिण घण्टाघरतर्फ लागेको थियो। ती गाडीहरू कुन सरकारी कार्यालयका थिए भन्ने यकिन छैन ।
यसैबीच, नागरिक समाजका अगुवा छठु साहले एक पीडित नागरिकले आक्रोश पोख्दा त्यसलाई कानुनी मुद्दा बनाउनु मन्त्रीको गलत निर्णय रहेकाे बताएका छन् । उनले भने, “देशका शीर्ष नेताहरूमाथि समेत सर्वसाधारणले सार्वजनिक रूपमा कठोर शब्द बोलेका घटना छन् तर उनीहरूलाई कानुनी दायरामा पुर्याइएन । मन्त्रीले सकारात्मक भूमिका खेल्नुको सट्टा उल्टै कानुनी कारबाहीतर्फ धकेल्नुभयो, यो गलत हो ।”
शनिबार पक्राउ परेकी २२ वर्षीया किरण साहविरुद्ध विद्युतीय अपराध, संघीय सांसदलाई धम्की दिएको तथा अफवाह फैलाएको मुद्दामा अनुसन्धान भइरहेको जिल्ला प्रहरी कार्यालय पर्साले जनाएको छ । अदालतले उनलाई थप तीन दिन हिरासतमा राखेर अनुसन्धान गर्न अनुमति दिएको प्रहरी प्रवक्ता डिएसपी किशोर लम्सालले जानकारी दिएका छन् ।
यसअघि सोमबार किरणको समर्थनमा उनकी आमा सावित्री साह र जसपा नेपाल निकट महिला नेतृहरूले प्रदर्शन गरेका थिए भने मंगलबार जसपा निकट अर्को समूहले उल्टै किरणविरुद्ध प्रदर्शन गरेको थियो ।
किरणका दाजु प्रमोद साहले भने, “मन्त्रीलाई अभिभावक सम्झेर समस्या सुनाउँदा बहिनीलाई हिरासतमा पुर्याइएकोमा दु:ख लागेको छ । बालबच्चा सम्झेर माफ गरिदिनुपर्थ्यो, मन्त्रीले यसरी कानुनी कारबाहीमा धकेल्नु भएन ।”
सम्बन्धीत समाचार
भिडियाे सामाग्री
