नेपालको दूरसञ्चार क्षेत्रमा लामो समयदेखि उठ्दै आएका सेवा गुणस्तरसम्बन्धी गुनासाहरूका बीच नेपाल दूरसञ्चार कम्पनी लिमिटेड (नेपाल टेलिकम) मा सुधारका प्रयास सुरु गरिएको छ ।
सञ्चार तथा सूचना प्रविधिमन्त्री डा. विक्रम तिमिल्सिनाको निर्देशनपछि कम्पनीले सेवा प्रवाहलाई प्रभावकारी बनाउन ठोस कदम अघि बढाएको हो । विशेषगरी ग्राहक सेवा, मोबाइल डेटा व्यवस्थापन, डिजिटल सेवा विस्तार तथा प्रशासनिक प्रक्रियामा सुधार ल्याउने उद्देश्यसहित व्यापक रूपान्तरण प्रक्रिया अघि बढाइएको छ ।
सञ्चार मन्त्रालयले ‘नतिजामा आधारित शासकीय व्यवस्थापन प्रणाली’ लागू गर्ने लक्ष्यसहित १० बुँदे सुधारात्मक कार्ययोजना ल्याएको छ । यसअन्तर्गत नेपाल टेलिकमको सेवा सुधारलाई प्राथमिकतामा राखिएको छ । ग्राहक सेवालाई सहज, पारदर्शी र प्रविधिमैत्री बनाउने लक्ष्य लिइएको मन्त्रालयले जनाएको छ।
विगतमा सेवा अवरोध, ढिलो प्रतिक्रिया, प्रक्रियागत झन्झट तथा गुनासो समाधानमा ढिलाइ जस्ता समस्या बारम्बार उठ्दै आएका थिए । यी समस्यालाई सम्बोधन गर्न मन्त्रालय र नेपाल टेलिकम दुवै पक्ष समन्वयात्मक रूपमा अघि बढिरहेका छन् ।
नयाँ व्यवस्थाअनुसार डाटा प्याकेज सकिएपछि स्वतः मुख्य ब्यालेन्सबाट रकम काटिने प्रणाली अन्त्य गरिएको छ । अब ग्राहकले आफूअनुकूल विकल्प छनोट गर्न सक्नेछन् । डाटा प्याकेजको ९० प्रतिशत प्रयोग भएपछि पूर्वसूचना दिइनेछ, जसले बाँकी डाटाबारे समयमै जानकारी दिनेछ ।
यससँगै ‘पे–एज–यू–गो (PAYG)’ प्रणाली पनि लागू गरिएको छ, जसअन्तर्गत प्याकेजबिना पनि आवश्यकताअनुसार इन्टरनेट प्रयोग गर्न सकिनेछ । ग्राहकले प्याकेज प्रयोग गर्ने वा PAYG मोडमा जाने निर्णय आफैं गर्न सक्ने व्यवस्था गरिएको छ ।
नेपाल टेलिकमका प्रवक्ता रविन्द्र मानन्धरका अनुसार उक्त प्रणाली हाल परीक्षण चरणमा रहेको छ र केही दिनभित्र पूर्ण रूपमा लागू गरिनेछ । उनका अनुसार USSD मार्फत खरिद गरिने डाटा प्याकमा यो सुविधा ३ देखि ५ दिनभित्र लागू हुनेछ भने मोबाइल एप प्रयोगकर्ताका लागि ७ देखि १० दिनभित्र कार्यान्वयनमा आउनेछ ।
ग्राहक सेवा प्रक्रियालाई सरल बनाउन ‘वन टाइम KYC’ प्रणाली लागू गर्ने निर्देशन पनि दिइएको छ । यसबाट ग्राहकले एकपटक मात्र विवरण बुझाएपछि पुनः कागजात बुझाउनुपर्ने झन्झट अन्त्य हुनेछ। यो प्रणाली आगामी ३० दिनभित्र कार्यान्वयन गर्ने लक्ष्य राखिएको छ ।
डिजिटल रूपान्तरण अन्तर्गत ई–सिम वितरण, गुनासो व्यवस्थापन, हराएको सिम पुनःप्राप्ति तथा सिम स्वामित्व हस्तान्तरण जस्ता सेवाहरू अब अनलाइन माध्यमबाट उपलब्ध गराइनेछ । यसले दुर्गम क्षेत्रका ग्राहकलाई ठूलो राहत दिने अपेक्षा गरिएको छ ।
त्यस्तै, ‘एकल विन्दु सेवा सहायता कक्ष’ स्थापना गर्ने योजना पनि अघि सारिएको छ, जसअन्तर्गत ग्राहकले सबै सेवा एकै स्थानबाट प्राप्त गर्न सक्नेछन् । यसले सेवा प्रक्रिया सरल र छिटो हुने विश्वास लिइएको छ ।
फोरजी मोबाइल नेटवर्कको गुणस्तर सुधार गर्न पनि काम भइरहेको मन्त्रालयले जनाएको छ । कमजोर सेवा रहेका स्थानहरूमा सेवा सुधारका लागि नीतिगत व्यवस्था परिमार्जन तथा अतिरिक्त फ्रिक्वेन्सी उपलब्ध गराउने तयारी भइरहेको छ ।
आगामी ३० दिनभित्र आवश्यक सुधार सम्पन्न गर्ने लक्ष्य राखिएको छ ।
