ऊर्जा, जलस्रोत तथा सिँचाइ मन्त्रालयले जनगुनासो सुन्ने मात्र नभई त्यसको तत्काल समाधान गर्ने कार्यशैलीलाई प्राथमिकतामा राखेको जनाएको छ । मन्त्रालयले सेवा प्रवाहलाई थप प्रभावकारी बनाउन पछिल्लो समय नयाँ अभ्यास सुरु गरेको ऊर्जा मन्त्री बिराज भक्त श्रेष्ठको सचिवालयले जानकारी दिएको छ ।
मन्त्री श्रेष्ठको निर्देशनपछि विद्युत् सेवासँग सम्बन्धित हटलाइन नम्बर ११५१ लाई थप प्रभावकारी बनाइएको सचिवालयले जनाएको छ । २४सै घण्टा सञ्चालनमा रहने उक्त हटलाइन अब केवल गुनासो टिप्ने माध्यममा सीमित नरही तत्काल समस्या समाधानका लागि प्रत्यक्ष संयन्त्रका रूपमा विकास गरिएको बताइएको छ ।
सचिवालयका अनुसार सेवाग्राहीका फोन, ह्वाट्स एप, इमेलदेखि ‘हेलो सरकार’मार्फत आएका गुनासोलाई सम्बन्धित निकायसँग समन्वय गरी तुरुन्त समाधान गर्ने प्रणालीलाई परिणाममुखी बनाइएको छ । मन्त्रालयले यसलाई नियमित प्रशासनिक प्रक्रियाभन्दा बढी उत्तरदायी र जवाफदेही ढङ्गले अघि बढाएको जनाएको छ ।
मन्त्रालयमा प्राप्त गुनासो सम्बन्धित निकायसम्म पुर्याउने मात्र नभई समाधानको अवस्थासम्म पुर्याउने अभ्यास सुरु गरिएको सचिवालयको भनाइ छ । मन्त्रालयका अनुसार चैत १५ गतेयता हटलाइन तथा अन्य माध्यमबाट १० हजार ३९२ भन्दा बढी गुनासो प्राप्त भएका छन् । चैत १५ देखि चैत ३० गतेसम्म फोनमार्फत ४ हजार २४८, ह्वाट्स एपबाट १४, इमेलबाट २ तथा हेलो सरकारमार्फत ५ वटा गुनासो दर्ता भएका थिए ।
त्यसपछि वैशाख महिनाभर फोनमार्फत ६ हजार २६, ह्वाट्स एपबाट ९२ र इमेलमार्फत १० वटा उजुरी प्राप्त भएका छन्। यसबाहेक लिखित रूपमा आएका दुई सयभन्दा बढी निवेदन तथा सञ्चारमाध्यममा प्रकाशित जनसरोकारका विषयलाई समेत सचिवालयले निगरानीमा राख्दै समाधान प्रक्रिया अघि बढाएको जनाएको छ ।
प्राप्त अधिकांश गुनासो विद्युत् सेवासँग सम्बन्धित रहेका छन्। विद्युतीय दुर्घटना, लाइन अवरुद्ध, ट्रान्सफर्मर बिग्रिने, कम भोल्टेज, प्रसारण तथा वितरण लाइन लत्रिने, पोल तथा टावर ढल्ने, पोल स्थानान्तरण, तारमा आगलागी, मिटर तथा पोल नपाउने, ईभी चार्जिङ समस्या, सिँचाइ समस्या तथा कर्मचारीले घुस मागेकोसम्मका गुनासो आउने गरेको मन्त्रालयले जनाएको छ ।
कतिपय घटनामा मन्त्रालयको प्रत्यक्ष सक्रियता पनि देखिएको छ। बाँकेको चिसापानी क्षेत्रमा कोहलपुर–सुर्खेत १३२ केभी प्रसारण लाइनअन्तर्गत दुई वटा टावर ढल्दा कर्णाली प्रदेशको विद्युत् आपूर्ति प्रभावित भएको घटनामा मन्त्रालयले तत्काल समन्वय गरी सेवा पुनः सञ्चालनलाई प्राथमिकता दिएको जनाएको छ ।
त्यस्तै, चट्याङका कारण ट्रान्सफर्मरमा क्षति पुग्दा स्याङ्जाको वालिङ र भीरकोट नगरपालिकामा अवरुद्ध विद्युत् सेवा करिब ६५ घण्टापछि पुनः सञ्चालनमा ल्याइएको थियो । काठमाडौँको स्वयम्भू क्षेत्रमा वर्षौँदेखि सडकको बीचभागमा रहेका पोल स्थानान्तरणको विषय पनि जनगुनासोकै आधारमा समाधान गरिएको सचिवालयले जनाएको छ ।
ऊर्जा मन्त्रालयले अवलम्बन गरेको यो शैलीले ‘सुनुवाइ हुने सरकार’को अनुभूति दिलाउने प्रयास गरेको सचिवालयको दाबी छ । गुनासो दर्ता गरेर महिनौँ कुर्नुपर्ने पुरानो प्रवृत्तिभन्दा फरक तत्काल प्रतिक्रिया र प्रत्यक्ष अनुगमनको अभ्यासले सार्वजनिक सेवा प्रवाहमा सुधार आउने तथा सेवाग्राहीको भरोसा बढ्ने अपेक्षा गरिएको छ ।
